لە هەولێر، سەرۆك كۆماری عێراق لەگەڵ سەرۆك وەزیرانی هەرێم كۆبووەوە، دۆخی ناوچەكە و پەیوەندییەكانی نێوان هەولێر و بەغداد تاوتوێكران.
لە چوارچێوەی سەردانەكەیدا بۆ هەولێر، ئەمڕۆ پێنجشەممە بەرهەم ساڵح، سەرۆك كۆماری عێراق لەگەڵ مەسرور بارزانی، سەرۆكی حكومەتی هەرێمی كوردستان كۆبووەوە.
بەپێی ڕاگەیەنراوێكی سەرۆكایەتی حكومەت، لە كۆبوونەوەكەدا جەخت لە پێویستیی چارەسەركردنی كێشە هەڵپەسێردراوەكانی نێوان حكومەتی فیدراڵی و هەرێمی کوردستان لەسەر بنەمای دەستوور کرایەوە.
لەو چوارچێویەدا پەسەندكردنی یاسای بودجەی فیدراڵی 2021، بە هەنگاوێكی ئەرێنی دانرا کە پێویستە بەشێوەیەكی دادپەروەرانە خزمەتی سەرجەم پێكهاتە و ناوچە جیاوازەكانی عێراق بكات و شایستە داراییەکانی هەرێمی کوردستانیش، بە زووترین کات بنێردرێت.
لە بەشێكی دیكەی ڕاگەیەنراوەكەدا هاتووە، ستایشی چاکسازییەکانی حکومەتی هەرێمی کوردستان کرا کە پێویستە هەموو لایەنەکان، پشتیوان بن لە سەرخستنی کارنامەی کابینەی نۆیەمی حکومەت، لەپێناو خزمەتکردنی بەرژەوەندی گشتیی و پاراستنی قەوارەی دەستووری هەرێمی کوردستان.
بەر لەو كۆبوونەوەیە، بەرهەم ساڵح، لەگەڵ مەسعود بارزانی، سەرۆكی پارتی دیموكراتی كوردستان كۆبووەوە.
بەپێی ڕاگەیەنراوێك، كە لەلایەن بارەگای بارزانی-یەوە بڵاوكراوەتەوە، هاتووە، كە لە كۆبونەوەكەدا دوایین گۆڕانكاری و پێشهاتە سیاسییەكانی گۆڕەپانی عێراق تاوتوێكرا و بیروڕا لەبارەی پڕۆسەی سیاسیی عێراق و هەڵبژاردنەكانی داهاتوو و تەحەددیاتی بەردەم پڕۆسەی سیاسیی عێراق ئاڵوگۆڕ كرا.
ڕاشگەیەندراوە، “هەر لەو دانیشتنەدا ڕۆشنایی خرایەسەر پەیوەندییەكانی نێوان هەرێم و بەغداد، چارەسەربوونی كێشەكان و هەماهەنگیی نێوانیان، وەك فاكتەرێك بۆ سەقامگیریی و بووژانەوەی سەرجەم بەشەكانی عێراق لە قەڵەمدرا”.
“بارودۆخی سیاسیی هەرێم و پەیوەندیی نێوان لایەنەكانی هەرێم، تەوەرێكی تری ئەو دانیشتنە بوو”، وەك ئەوەی لە ڕاگەیەندراوەكەدا هاتووە.
