ئەمشەو، چوارشەممە لە چوارچێوەی ڕوبەڕوبوونەوەکانی چوونی قۆناغی نیوەی کۆتایی چامپیۆنزلیگ، یانەی پاریس سان جێرمان ڕوبەڕووی مانچستەر سیتی بووەوە و یاری نێوانیان بە بردنەوەی یانە ئینگلیزییەکە کۆتاییهات.
لە ڕوبەڕوبوونەوەیەکی ئاگرین و لوتکەی قۆناغی نیوەی کۆتایی چامپیۆنزلیگ، یانەی پاریس سان جێرمان لە پارک دی فرانس میوانداری مانچستەر سیتی کرد، یاریی نێوان دوو زەبەلاحەکە بە ئەنجامی (1-2) لەبەرژەوەندی ئەستێرەکانی گواردیۆلا کۆتاییهات.
ماوریسیۆ پۆچتینۆی ڕاهێنەری پاریس لە تایمی یەکەمدا باڵادەستی نیشاندا و توانی لە ڕووە هونەرییەکانەوە باشتر دەربکەوێت، بەڵام لە تایمی دووەمدا گواردیۆلا سیناریۆکانی پێچەوانەکردەوە و کۆنتڕۆڵی وردودرشتی یارییەکەی کرد.
گۆڵەکەی پاریس لە خولەکی 15 لەلایەن مارکینیۆس، دوو گۆڵەکەی سیتیزن لە خولەکەکانی 64 و 71 لەلایەن کیڤن دی برۆین و ڕیاز مەحریزەوە تۆمارکران، لە خولەکی 77یشدا ئیدریسا گایێی ناوەندکاری پاریس بەکارتی سوور لە یاریگا کرایەدەرەوە.
بەپێی ئەنجامە تۆمارکراوەکە، مان سیتی توانی پێشەنگی بگرێت و لە یاریی گەڕانەوەدا کە بڕیارە لە ئیتیحاد ستادیەم ئەنجامبدرێت پێویستیان بە تۆمارکردنی ئەنجامی یەکسانبوونە، تەنانەت بە ئەنجامی دۆڕاندن (1-0) سەرکەوتن بۆ یاری کۆتایی مسۆگەردەکەن، واتا نێیمار و مباپێ و هاوەڵانیان پێویستیان بە بردنەوە دەبێت بە دوو گۆڵ زیاتر بەو مەرجەی سیتی سەرکەوتوو نەبێت لە تۆماری گۆڵ.
