وتەبێژی پۆلیسی ڕاپەڕین ڕایگەیاند، ئێوارەی ئەمڕۆ کەسێک لە ناحیەی چوار قوڕنە دەستڕێژی گولـلەی لێکراوە و کوژراوە،
شۆڕش ئیسماعیل، وتەبێژی پۆلیسی ڕاپەڕین بە تۆڕی میدیایی ئێستای ڕاگەیاند، “بەپێی زانیارییە سەرەتاییەکان ئەو کەسەی کە کوژراوە بەهۆی کێشەی کۆمەڵایەتییەوە بووە و ئێمەش لێکۆڵینەوەمان دەستپێکردووە”.
بەپێی زانیارییەکان ڕوداوەکە لە نزیک کۆمەڵگەی فەرمانگەکانی چوار قوڕنە ڕویداوە و لە ئۆتۆمبیلێکەوە دەستڕێژی گولـلە لە کەسێک کراوە و کوژراوە.
لە ماوەی حەفتەیەکدا ئەوە سێهەمین ڕوداوی کوشتنە لە سنوری ئیدارەی ڕاپەڕین، ڕۆژی 22 ی ئەم مانگە، لە ڕوداوێکی هاوشێوەدا گەنجێکی تەمەن 33 ساڵ لە ناحیەی حاجیئاوا درایە بەر دەستڕێژی گولـلە و کوژرا، هاوکات ڕۆژی 16ی ئەم مانگەش پۆلیسێکی دارستان لەلایەن چەند کەسێکەوە کوژرا و دواتر شەش کەس لەسەر ئەو ڕوداوە دەستگیرکرا،
