كەشناسیی هەرێم ڕایدەگەیەنێت، سبەی بارانبارین لە ناوچە شاخاوییەكان دەستپێدەكات و بۆ ڕۆژی دواتریش پێشبینیی بارانبارین لە سەنتەری شارەكان دەكرێت.
بەڕێوەبەرایەتیی گشتیی كەشناسی و بومەلەرزەزانیی هەرێم ئەمڕۆ یەكشەممە بڵاویكردەوە، سبەی ئاسمانی هەرێم بەگشتی نیمچەهەور و هەوری تەواو دەبێت، پێشبینیی بارانبارینی پچڕ پچڕ دەكرێت لە ناوچە شاخاوییە سنووری و بەرزەکانی ناوچە جیاجیاکانی هەرێم.
دەشڵێت، بارانبارینەكە سەرەتا لە ناوچە شاخاوییەکانی سنووری پارێزگای دهۆک و پاشان لە ناوچە شاخاوییەکانی سنووری پارێزگای هەولێر دەبێت.
كەشناسیی هەرێم پێشبینی زیادبوونی خێرایی با و ئەگەری بەرزبوونەوەی تۆز و خۆل و بەهۆیەوە كەمبوونەوەی مەودای بینین دەكات.
سەبارەی بە ڕۆژی سێشەممەش، پێشبینی دەكرێت کاریگەریی ئەو بارودۆخە ناسەقامگیرەی کەشی ناوچەکە بەردەوامیی هەبێت، پێشبینیی بارانبارین لە سەنتەری پارێزگاكانی (هەولێر، سلێمانی، دهۆک و هەڵەبجە) بەشێوەی نمە باران هەیە لە هەندێ کات، بۆ سەر ناوچە شاخاوییەکانیش بارانبارین زیاتر دەبێت و هەورەبروسكەشی لەگەڵ دەبێت، وەك ئەوەی كەشناسی ئاماژەی پێداوە.
