ڕزگاربوویەکی ئەنفال لەسەر کەمتەرخەمی لە دەرهێنانی گۆڕەبەکۆمەڵەکان داوای یاسایی لەسەر دامەزراوەی شەهیدانی عێراق و پارێزگاری سەماوە تۆمارکرد.
تەیموری ئەنفال، کە یەکێکە لە ڕزگاربووەکانی کارەساتی ئەنفال ئەمڕۆ 12ی تشرینی یەکەم ڕایگەیاند، “لەسەر ئەو پێشێلکاریانەی کە لەسەر گۆڕەبەکۆمەڵەکان بینراوە کە زوڵمێکە دژی مرۆڤ و ئاین و نەتەوەش نیگەرانی خۆم چەندجارێک ڕاگەیاندووە، ئێستاش ئەو کەمتەرخەمییانە بەردەوامە و چەندینجار خۆم کەلوپەلی ئەنفالکراوانم کۆکردوەتەووە لە کاتێکدا نابێت بچوکترین شت لە گۆڕەکان بەجێبمێنێت”.
تەیمور ئاشکرایکردووە، “بەهۆی ئەوەی ڕەخنەم لە کەمتەرخەمی دامەزراوەکە و پارێزگار گرتووە دامەزراوەی شەهیدانی عێراقیش سکاڵای لەسەر من تۆمارکردووە کە گوایە ناویانم زڕاندووە و داوای قەرەبوو دەکەن، بەڵام دڵنیام ئەمە بۆ ئەوەیە کە سکاڵاکەم بکشێنمەوە، منیش هەرگیز ئەوە ناکەم”.
تەیمور یەکێکە لەو ڕزگاربوانەی کە لە ئەنفالەکانی ساڵانی 80 بە شێوەیەکی سەرسوڕهێنەر لە یەکێک لە کوشتارگەکانی حزبی بەعسدا لە بیابانەکانی سەماوە ڕزگاری بوو و بەڵام لەو ئەنفالەدا دایک و سێ خوشکی و 110 کەس لە بنەماڵە و ناسراوەکانی لە شەوێکدا کۆمەڵکوژکراون.
