بەڕێوەبەرایەتیی ئاسایشی سلێمانی لەبارەی درۆنەوە هاوڵاتییان ئاگاداردەکاتەوە، ڕایگەیاندووە، هەر کەسێک بەبێ مۆڵەت درۆن بەکاربهێنێت سزای دەدەین.
لە ڕاگەیەندراوێکدا ئاسایشی سلێمانی ڕایگەیاند، بەمەبەستی ڕێکخستنەوەی مۆڵەت و ڕێکارەکانی بەکارهێنانی درۆن پێیوستە سەرجەم بەکارهێنەرانی ئامێری درۆن سەردانی ئاسایش بکەن.
ئاماژە بەوەکراوە، “ئاسایشی پارێزگای سلێمانی ئاگاداری سەرجەم بەکارهێنەرانی ئامێری درۆن دەکاتەوە لە سنووری پارێزگای سلێمانی و دەوروبەری سەردانی بەڕێوەبەرایەتیی ئاسایشی پارێزگای سلێمانی بکەن بۆ تۆمارکردنی ئامێرەکانیان و پێدانی ڕێنمایی لەسەر ڕێکارەکانی بەکارهێنانی”.
تێیدا هاتووە، هەر کەسێک بەبێ مۆڵەت ئامێری درۆن بەکاربهێنێت ڕووبەڕووی سزای یاسایی دەبێتەوە و دەست بەسەر ئامێرەکەیدا دەگیرێت.
داواش دەکات لەکاتی بینین درۆندا پەیوەندی بە هێڵی گەرمی ژمارە (106)ـەوە بکەن.
