وەزارەتی پلاندانانی عێراق ئاشكرایكردووە، پلانیان هەیە كە ڕوبەڕووی هەژاری ببنەوە، پارێزگای موسەناش زۆرترین ڕێژەی هەژاری تێدایە.
عەبدولزەهرە هینداوی، وتەبێژی وەزارەتی پلاندانانی عێراق ئەمڕۆ شەممە ڕایگەیاندووە، “وەزارەتی پلاندانان پلان و سیاسەتی هەیە بۆ ئەوەی سنوورێك بۆ هەژاری دابنێت، بۆ ئەوەی وا لە هەژاران بكرێت بتوانن داهاتی ڕۆژانە و شوێنی نیشتەجێبوونیان هەبێت”.
وتەبێژەكەی پلاندانانی عێراق ئاماژەی بەوەشكردووە، “وەزارەتەكەمان كاردەكات بۆ ئەوەی پاڵپشتی لەو گوندانە بكات كە زۆرترین ڕێژەی هەژاری تێدایە”.
ئاشكراشیكردووە، لەڕێی ئەو پلانەوە دەیانەوێت وا بكەن، خزمەتگوزاری و داهاتی تاكی گوندەكان فەراهەم بكرێت.
لەبارەی دەستپێكردنی ئەو پلانانە، وتەبێژی وەزارەتی پلاندانانی عێراق ڕایگەیاندووە، “لە قۆناغی یەكەمدا لە هەریەك لە پارێزگاكانی موسەنا و سەڵاحەدین و دهۆك دەست بە پرۆژەكانی بوونیادنانەوەی گوندەكان دەكرێت”.
ئەوەشی خستوەتەڕوو، “پارێزگای موسەنا زۆرترین ڕێژەی هەژاری تێدایە كە 52%، دواتر پارێزگای دیوانیە و پارێزگای زیقار دێن، هەرێمی كوردستان ڕێژەی هەژاری كەمترە”.
