بەڕێوەبەرایەتیی گشتیی کشتوکاڵی گەرمیان ئاشکرایکرد کە وشکەساڵی و وشکبوونەوەی زەوییەکان زیانێکی زۆری بە ناوچەکە گەیاندووە و بڕەکەی 160 هەزار دۆنم زەویی کشتوکاڵی دەبێت.
شادیە حسێن، بەڕێوەبەری گشتیی کشتوکاڵی گەرمیان ڕایگەیاند، “بەهۆی کەمی ڕێژەی بارانبارین و کەمئاوی لەمساڵدا لە سنوری ئیدارەی گەرمیان زەوییە کشتوکاڵییەکانی ئەم سنوورە ڕوبەڕویی زیانی زۆر بوونەتەوە و زیانێکی زۆریش بە ئاژەڵەکانی ناوچەکە دەگات”.
ئاماژەی بەوەکردوە، “لە سنورەکەدا 611 هەزار مەڕ، 134 هەزار بزن، 10 هەزار مانگا و زیاتر لە هەزار گامێش هەیە کە کەمی بارانبارین و کەمئاوی زیانی زۆر بەم سامانە ئاژەڵیانە دەگەیەنێت”.
بەڕێوەبەری گشتیی کشتوکاڵی گەرمیان باسلەوەدەکات، بۆ چارەسەری قەیرانی کەمئاویی ناوچەکە داوایان لە وەزارەتی کشتوکاڵ و سەرچاوەکانی ئاو کردووە بودجە تەرخان بکات بۆ ناوچەکە.
پێشتریش ڕۆژی سێشەممەی هەفتەی ڕابردوو ئیدارەی گەرمیان ڕایگەیاند کەمئاوی لە ناوچەکەیاندا کاریگەریی زۆری نەرێنیی دروستکردووە و داوایکرد کە بودجەی پێویست بۆ چارەسەرکردنی تەرخانبکرێت.
