جۆناسان ڕینۆڵدز، بەرپرسی سیاسەتەكانی خانەنشینی لە پارتی كرێكارانی بەریتانیا، ئەمڕۆ یەكشەممە 11ی تشرینی یەكەم ڕایگەیاند، “بۆریس جۆنسن، سەرۆكوەزیران چیتر توانای كۆنترۆڵكردنی قەیرانی پەتای كۆرۆنا-ی لەدەستدا نەماوە.”
لە گفتوگۆیەكدا لەگەڵ كەناڵی “سكای نیوز” ڕینۆڵدز ڕەخنەی لە سەرۆكوەزیرانی بەریتانیا گرت لەڕووی ڕوبەڕوبوونەوەی پەتای كۆرۆنا و وتی، “توندكردنی كۆتە تەندروستییەكان، سەرباری پێویستییان، بەسنییە بۆ ڕوبەڕوبوونەوەی بارودۆخەكە، پێویستە هاوكاریی دارایی زیاتر پێشكەش بكرێت.”
وتیشی، “جۆنسن توانای كۆنترۆڵكردنی قەیرانی پەتای كۆرۆنا-ی لەدەستداوە.”
وتەكانی بەرپرسی سیاسەتەكانی خانەنشینی لە پارتی كرێكارانی بەریتانیا، دوای ئەوە دێن كە حكومەتی ئەو وڵاتە دەستیكردووە بە گرتنەبەری ڕێوشوێنی نوێ بۆ ڕوبەڕوبوونەوەی كۆرۆنا لەڕێگەی توندكردنی كۆت و بەندە تەندروستییەكان، بەبێ ئەوەی پرسەكە لەگەڵ پارت و لایەنەكانی تر و ڕای گشتیی بەرتیانیا دا تاوتوێ بكات، لە بەرانبەردا شەقام ڕەخنە لەو ڕێوشوێنانە دەگرێت.”
لە بەریتانیا تەنها ئەمڕۆ یەكشەممە، 65 كەس بە كۆرۆنا مردوون و 12 هەزار و 872 كەسی تر تووشی پەتاكە بوون.
