سەرۆکی فیدراسیۆنی تۆپی پێی ئەوروپا، ئەلیکساندەر چیفرین بە ئاشکرا هەڕەشەی دوورخستنەوەی ڕیاڵ مەدرید لە خولی یانە پاڵەوانەکانی ئەوروپا دەکات.
لە وەڵامی پرسیارێکدا سەبارەت بە سووربوونی سەرۆکی یانەکانی ڕیاڵ مەدرید و بەرشلۆنە لەسەر بیرۆکەی سازکردنی خولی سوپەری ئەوروپی و پەشیمان نەبوونەوەیان لە کۆتا هەوڵەکانیان، چیفرین دەڵێت، ” پێرێز سەرۆکی دەستەی دامەزرێنەری خولێکە کە بوونی نییە، سەرۆکی هیچ شتێک نییە، من لە هەموو یانە بەشدارەکانی خولەکە بێزار و توڕەم، بەڵام کەمتر لە سەرۆکی بەرشلۆنە، چونکە دوو مانگە بووە بە سەرۆکی یانە و پێش ئەو هەموو شتێک یەکلاییکراوەتەوە”.
چیفرین لەبارەی سزادانی یانەی ڕیاڵ مەدریدەوە، دەڵێت، ” پێموابێت ئەگەرێک بۆ دوورخستنەوەی ڕیاڵ مەدرید لە قۆناغی نیوەی کۆتایی خولی یانە پاڵەوانەکانی ئەم وەرزە لە ئارادایە، بەڵام ئەگەرەکە کەمێک لاوازە بەهۆی مافەکانی پەخشی تەلەفزیۆنی و پاراستنی یانەکان، بەڵام وەک وتم ئێمە لە هەموو ڕووەکانەوە لێکدانەوەی بۆ دەکەین”.
سەرۆکی “یوێفا” لەبارەی وەڵامەکانی پێرێز و ڕەخنەکانی لە فیدراسیۆنی تۆپی پێی ئەوروپا، دەڵێت، ” خۆشحاڵم ئەم ڕەخنانە لە زاری پێرێزەوە دەبیستم، چونکە ئەو تەنها بەدوای بەرژەوەندی خۆیدا دەگەڕێت، کەسێکی دەوێت بە قسەی بکات، منیش لێرەم بۆ پاراستنی بەرژەوەندییەکانی فیدراسیۆنەکە”.
