وەزارەتی بەرگریی ڕوسیا ڕایگەیاند، بەهۆی بۆردوومانکردنی چەند پێگەیەکی هێزەکانی ئۆپۆزسیۆن، کە بە “تیرۆریستان” ناوی بردوون، 200 ئەندامی ئەو هێزانە کوژراون.
وەزارەتی بەرگریی ڕوسیا لە بەیاننامەیەکدا ڕایگەیاندووە، “دوای کۆکردنەوەی زانیاریی ورد لەسەر جوڵەی هێزەکانی دژەحکومەت لە نزیک پالمێرا و باکوری ڕۆژئاوای سوریا، بۆردومانی پێگەی ئەو هێزانە کراوە و ڕێگەیان لێگیراوە لە نانەوەی پشێوی لە سوریا”.
بەوتەی وەزارەتی بەرگریی ڕوسیا، هۆکاری ئەو هێرشانە ئەوە بووە، کە هێزەکانی دژەحکومەت ویستویانە بە پیلانێک بەربەست بۆ هەڵبژاردنی سەرۆکایەتیی سوریا دروستبکەن.
ڕوسیا ئاشکرایکردووە، لە هێرشەکاندا 24 ئۆتۆمبیل و سەدان کیلۆگرام مادەی تەقینەوە لەناوبراون و 200 ئەندامی ئەو هێزانە کوژراون.
بەوتەی وەزارەتی بەرگریی ڕوسیا، لە حاڵەتێکدا ئەگەر ڕێگری لەو هێزانەی ئۆپۆزسیۆن نەکرایە، هێرشەکانیان سوریای دەخستە دۆخێکی دیکەوە.
ئەوە لە کاتێکدایە ئەنجومەنی گەلی سوریا ڕۆژی 26 ی مانگی داهاتووی بۆ هەڵبژاردنی سەرۆکایەتی سوریا دیاریکردووە و واتە مانگی داهاتوو سەرۆکی نوێی سوریا دیاریدەکرێت.
