وەزارەتی پەروەردە ڕایدەگەیەنێت، تا كۆبوونەوەی داهاتووی لیژنەی بەرەنگاربوونەوەی كۆرۆنا ناوەندەكانی خوێندن بە داخراوی دەمێننەوە.
وەزارەتی پەروەردەی حكومەتی هەرێمی كوردستان ئەمڕۆ پێنجشەممە 8ی نیسان ڕاگەیەنراوێكی بڵاوكردەوە و تیایدا هاتووە، تاوەکو ئەنجامدانی کۆبوونەوەی لیژنەی باڵای بەرەنگاربوونەوەی ڤایرۆسی کۆرۆنا، تەواوی ناوەندەکانی خوێندنی سەر بە وەزارەتی پەروەردە (حکومی – ناحکومی) بە داخراوەیی دەمێننەوە.
دەشڵێت، “تەنها تاقیکردنەوەکان ئەنجام دەدرێن، بە گوێرەی خشتەی ڕاگەیەنراو بەردەوام دەبن بە ڕێککارەکانی خۆپارێزیییەوە”.
بڕیارەكەی وەزارەتی پەروەردە لەكاتێكدایە بەهۆی زۆربوونی حاڵەتەكانی توشبوون و مردن بە كۆرۆنا، شەوی ڕابردوو وەزارەتی ناوخۆی هەرێم قەدەغەی هاتوچۆی ئۆتۆمبێل و پیادەی لە تەواوی پارێزگاكانی هەرێم و ئیدارە سەربەخۆكان لە كاتژمێر 08:00ی شەو تا كاتژمێر 06:00ی بەیانی ڕاگەیاند.
بڕیارەكە لە كاتژمێر 08:00ی ئەمشەو 8ی نیسان تا ئێوارەی 12ی نیسان جێبەجێدەكرێت.
