زۆرینەی ئەندامانی ئەنجومەنی پارێزگای سلێمانی یاداشتێکیان واژوو کردووە وەک پشتگیری لە هەڵمەتەکەی ئاسایشی سلێمانی بۆ دەستگیرکردنی “هاوڕەگەزخوازەکان”.
لە یاداشتەکەدا کە 17 ئەندامی ئەنجومەن واژوویان کردووە تێیدا هاتووە، ” پێویستە لە ڕێگەی بەڕێوبەرایەتی گشتیی چاودێری کۆمەڵایەتیەوە ناوەندێک بۆ ئەم کەسانە بکرێتەوە و ئاگادار بکرێنەوە هۆشیاری زیاتریان پێبدرێت”.
ئەنوەر تاهیر، ئەندامی ئەنجومەنی پارێزگای سلێمانی یەکێک لەو کەسانەیە کە واژووی یاداشتەکەی کردووە و بە تۆڕی میدیایی ئێستای وت، “ئێمە هەست بە مەترسییەکە دەکەین و پێمان وایە هاوڕەگەزخوازی ماوەیەکە برەوی پێدەدرێت، ئەمە بەبێ هیچ فلتەرێک خەڵکی لەو جۆرە دێتە هەرێم و لەسەر جادەکان دەبینرێت، بۆیە ئێمە داوای دانانی پلانێک بۆ ئەم دیاردەیە دەکەین”.
بە وتەی ئەو ئەندامەی ئەنجومەنی پارێزگای سلێمانی پێویستە وەزارەتی کار و کاروباری کۆمەڵایەتی لەسەر دیاردەکە پڕۆژەی هەبێت و ناوەندێک دروست بکرێت بۆ کۆنترۆڵکردن و پێدانی هۆشیاری زیاتر بەو کەسانە، “چونکە ئەوەی دەبینرێت پێچەوانەی داب و نەریتی کوردەوارییە و کاریگەری لەسەر گەنجانمان دەبێت”.
