وتەبێژی فەرماندەی گشتیی هێزە چەكداریەكانی عێراق ئاشكرایكردووە، “ئۆپراسیۆنە سەربازییەكان بەردەوام دەبن تا ئەو كاتەی هەموو پاشماوەكانی داعش لەناودەبرێن”.
یەحیا ڕەسول، وتەبێژی فەرماندەی گشتیی هێزە چەكداریەكانی عێراق ئەمڕۆ یەكشەممە 4ی نیسان، بە ئاژانسی هەواڵی عێراقی وتووە، “ئەو ستراتیژەی كاری لەسەر دەكەین بۆ بە ئامانجگرتنی پاشماوەكانی داعش، سەركەوتووە”.
ئەوەشی خستوەتەڕوو، “چاودێریی وردی سنووری نێوان عێراق و سوریا دەكەین، بەردەوامیش دەبین لە باە ئامانجگرتنی تیرۆریستان”.
یەحیا ڕەسول ئاماژەی بەوەشكردووە، “زۆرێك لە ئۆپراسیۆنە ئەمنییەكان لەلایەن دەزگای دژەتیرۆر و بە هەماهەنگی لەگەل هێزی ئاسمانی و فڕۆكەوانیی سەربازی و هاوپەیمانان ئەنجامدراون”.
ئەو وتانەی وتەبێژی فەرماندەی گشتیی هێزە چەكدارەكانی عێراق لەكاتێكدایە، ناوبەناو سوپای عێراق و هێزە ئەمنییەكان هەڵمەتی پاككردنەوەی ناوچەكانی عێراق لە داعش ڕادەگەیەنن.
