جێگری بەڕێوبەری هەواڵگری عێراق ڕوبەڕووی هێرشێكی چەكداری بووە و سەرچاوەیەكی ئەمنیش دەڵێت، ئامانجەكە كەسێكی دیكە بووە.
سەرچاوەیەكی ئەمنی عێراقی ئەمڕۆ شەممە 3ی نیسان بڵاویكردەوە، ژمارەیەك لە ڕۆڵەكانی هۆزێك لە ئامادەباشیدابوون بۆ هێرشكردنەسەر شێخی هۆزێكی دیكە كە ناكۆكی لەنێوانیاندا هەیە، گومانیان لە ئۆتۆمبێلی بەرپرسە سەربازییەكە كردووە و تەقەیان لێكردووە.
ئاژانسی هەواڵی فەرمی عێراق لەسەر زاری سەرچاوەكەوە ڕونیشیكردەوە، عەمید ڕوكن زەید مەكسوسی، یاریدەدەری بەڕێوبەری هەواڵگریی سەربازی لە وەزارەتی بەرگری لە هەوڵی كوشتنەكە ڕزگاری بووە، كە لە ناوچەی پردی دیالە لە باشووری بەغداد ڕوبەڕووی بووەتەوە.
بەپێی میدیاكان مەكسوسی ڕوبەڕووی چەكدارەكان بووەتەوە و پێكدادان لەنێوانیاندا ڕویداوە و بەوەش لە هەوڵەكە دەربازبووە.
بەپێی ئاژانسەكە هێزە ئەمنییەكان توانیویانە سێ كەس لە چەكدارە هێرشكارەكان دەستگیربكەن.
س: ئەلحوڕە + واع
