بەڕێوبەرانی یانەی مانچستەر سیتی لە میرکاتۆی هاوینی 2021 بۆندی هەریەک لە کیڤن دی برۆین و ڕەحیم ستێرلینگ نوێدەکەنەوە.
سەرەڕای ئەوەی بۆندی دی برۆین و ستێرلینگ تاوەکو 2023 لەگەڵ مانچستەر سیتی بەردەوامی دەبێت، بەڵام بەڕێوبەرانی سیتیزن دەیانەوێت بۆ ماوەیەکی درێژخایەن بەردەوامی بە پەیوەندیەکانی نێوانیان بدەن، بۆ ئەم مەبەستەش لە هاوینی 2020 دانوستاندن لەگەڵ هەردوو یاریزانەکەدا کرا و بەهۆی چەند کێشەیەکەوە گفتوگۆکان ڕاگیران.
بەپێی زانیاریەکانی ڕۆژنامەی دەیلی ئێکسپرێس، هاوینی 2021 جارێکی دیکە بەڕێوبەرانی سیتیزن لەسەر داواکاری پێپ گواردیۆلا ئۆفەری نوێ پێشکەشی ڕەحیم و دی برۆین دەکەن، یەکەمین هەوڵەکانیش بە ئاڕاستەی یاریزانە بەلجیکیەکە دەبێت.
سەرچاوەکە ئەوەشی ئاشکراکردووە، کە ستێرلینگ داوای زیادکردنی موچەکەی دەکات و کیڤن دی برۆین لە چاوەڕوانی کڕینی مێسی و دەرکەوتنی ڕێژەی موچەکەیدایە، تاوەکو داوای هەممان بڕی موچە لە ئیدارەی یانەکەی بکات، بەڵام کشانەوە لە هاوکێشەی مێسی پێدەچێت یاریزانەکە ناچاربکات بە ئۆفەرە نوێیەکان قایلبێت.
لەم وەرزەدا یانەی مانچستەر سیتی بە کۆکردنەوەی 71 خاڵ لوتکەی ڕیزبەندی یانەکانی ئینگلتەرای گرتووە و لە چنینەوەی نازناوی وەرز نزیکبوونەتەوە.
