وەزارەتی ڕۆشنبیری حکومەتی هەرێمی کوردستان ڕایگەیاند، بەهۆی بەرزبوونەوەی ئامارەکانی ڤایرۆسی کۆرۆنا تەواوی چالاکییەکانی لە پارێزگاکانی هەرێم ڕادەگرێت.
لە ڕاگەیەندراوێکدا وەزارەتی ڕۆشنبیری هەرێم دەڵێت، ” تا ئەوكاتەی لە لیژنەی باڵای رووبەڕووبوونەوەی كۆرۆنا رێنمایی نوێ دەردەکرێت، تەواوی بەڕێوبەرایەتییەکانی سەر بە وەزارەت ئاگادار دەکەینەوە کە هەموو چالاکی و گردبوونەوەیەک ڕابگرن”.
لە ڕاگەیەندراوەکەی وەزارەتی ڕۆشنبیریدا هاتووە، ” ئەوەی پەیوەندی بە وەزارەتی رۆشنبیری و لاوان ـ ەوە هەیە، لەچوارچێوەی هەڵمەتی خۆپارێزیدا، سەرجەم بەڕێوەبەرایەتییە گشتییەکان و بەڕێوەبەرایەتی و تەواوی ئۆرگانەکانی پەیوەست بە سێکتەرەکانی کاروباری وەزارەتمان ئاگادار دەکەینەوە کە هەموو جۆرە چالاکی و گردبوونەوەیەک رادەگیرێت تا ئەو کاتەی لیژنەی باڵای بەرەنگاربوونەوەی ڤایرۆسی کۆرۆنا رێنمایی تازە دەردەکات”.
وەزارەتەکە ئاماژەی بەوەشکردووە، ” وەک ئاگادارن ماوەیەکە بەشێوەیەکی خێرا و بەرچاو شەپۆلێکی تری ڤایرۆسی کۆرۆنا لە هەرێمی کوردستان بڵاوبووەتەوە، بەپێی هۆشدارییەکانی وەزارەتی تەندروستی ئەگەر دۆخەکە بەو شێوەیە بێت لە ماوەیەکی کەمدا لە کۆنترۆڵ دەردەچێت”.
