ڕاهێنەری یانەی ئارسیناڵ، میکێل ئارتێتا ئاماژە بە گواستنەوەی یاریزانی نوێ بۆ پێکهاتەکانی دەکات و دەڵێت: پێویستمان بە جێگیربوونە.
بەر لەوەی یانەیەکەی ڕوبەڕوی وێستهام ببێتەوە، لە کۆنگرەیەکی ڕۆژنامەوانیدا ئارتێتای ڕاهێنەری ئیسپانی گانەرز وەڵامی چەندین پرسیاری دایەوە، گرنگترینیان لەبارەی گواستنەوەکانی هاوینی 2021وە بوون.
ئارتێتا لە وەڵامەکانیدا ڕایگەیاند، ” پلانی گواستنەوەکان لە هاوین تاووتوێ دەکەین، پاشان لەگەڵ ئیدارەی یانە بڕیاری لەبارەیەوە دەدەین، بەڕوونی دیارە چیمان دەوێت و چۆن دەمانەوێت ئەنجامی بدەین”.
هەروەها دەڵێت، ” ئەوەی لە گواستنەوەکانی زستانە کردمان ناوازەبوو، ئەگەر بە وردی لەوە بڕوانین کە لە ماوەی 12 مانگدا کردوومانە، دەردەکەوێت چ کارێکی باش کراوە، هەموو ئەمانە بەردەوامیان دەبێت، چونکە پێویستمان بە جێگیربوونە، پێویستە بگەینە ئەو ئاستەی لە گواستنەوەیەکدا پێویستمان بە گۆڕانکارییەک یان دووان بێت و لەو کاتەدا دەزانین لە جێگیربووین، بەم زووانە دەگەین بەو خاڵە، تاوەکو ئەو کاتەش دیسانەوە پێویستمان بە چەسپاوی و ڕوحیەتی کێبڕکێکاری دەبێت”.
بەپێی ئەو زانیاریانەی سەرچاوە ئینگلیزیەکان بڵاویدەکەنەوە، لە گواستنەوەکانی هاوینەی 2021 و لەسەر ڕاسپاردەی ئارتێتا یانەی ئارسیناڵ چەندین یاریزانی نوێ دابیندەکات.
