بەشە خۆراكی مانگانەی ژمارەیەك توێژ ڕادەگیرێت

ئەنجومەنی وەزیرانی عێراق ڕاگرتنی بەشە خۆراكی مانگانەی ژمارەیەك توێژی جیاجیا لە مانگی حوزەیرانی داهاتووەوە ڕادەگەیەنێت.

بەپێی بڕیارێكی ئەنجومەنی وەزیران كە ئەمڕۆ پێنجشەممە 18ی ئازار بڵاوكراوەتەوە، بڕیارەكە ژمارەیەك توێژ دەگرێتەوە و لە مانگی حوزەیرانی داهاتووەوە جێبەجێ دەكرێت.

بڕیارەكە ئەم توێژانە دەگرێتەوە:
– ئەو كەسانەی هاوسەرگیرییان نەكردووە و داهاتی مانگانەیان لە 1.5 ملیۆن دینار زیاترە.
– بەڵێندەرانی تۆماركراو تا پلەی شەشەم.
– خاوەن كۆمپانیا تۆماركراوەكان لە فەرمانگەی تۆماری كۆمپانیاكان (بەڕێوبەر بن یان هاوپشك).
– تۆماركراوان لە ژووری بازرگانی تا پلەی دووەم، پیشەسازەكان تا ئاستی سێیەم، یەكێتی خاوەنكاران، سەرەڕای سەندیكای پزیشكان، پزیشكانی ددان و سەندیكای دەرمانسازان.
– ئەو كەسانەی ئەژماری باجیان هەیە كە زیاتربێت لە (18) ملیۆن دیناری ساڵانە.
– ئەوانەی زیاتر لە سێ مانگە لە دەرەوەی عێراقن (بەشێوەی كاتی ڕادەگیرێت تا گەڕانەوەیان دەسەلمێندرێت).
-نیشتەجێبووانی دەرەوەی وڵات.
– ئەو عێراقییانەی هەڵگری ڕەگەزنامەی وڵاتی میوانن.
– بەندكراوانی بەندینخانە ناوەندییەكان (تا كاتی ئازادكردنیان) مردووانی ناو بەندینخانەكان، كەسانی سەر بە گروپە تیرۆرستییەكان و هەڵهاتووان لە دادگا.
– عەرەب و بیانی و كۆچبەران جگە لە خێزانە فەڵەستینییەكان.

هەر بەپێی بڕیارەكە وەزارەت و دامودەزگا نەبەستراوەكان بە وەزارەت و پارێزگا و یەكە ئیدارییەكان پابەندراون بە ئاگاداركردنەوەی وەزارەتی بازرگانی دەربارەی ئەو فەرمانبەرانەی كۆی موچەیان (ملیۆنێك و 500 هەزار دینار) و زیاترە.