ئەمشەو، چوارشەممە لە چوارچێوەی ڕوبەڕوبوونەوەکانی گەڕانەوەی قۆناغی 16ی چامپیۆنزلیگ، بایرن میونشن و چێڵسی سەرکەوتنیان بۆ قۆناغی چارەکی کۆتایی مسۆگەرکرد.
لە ڕوبەڕوبوونەوەیەکی ئاگریندا یانەی چێڵسی ئینگلیزی لە یاریگای ستامفۆرد بریج میوانداری ئەتلەتیکۆ مەدریدی ئیسپانی کرد، یارییەکە بە بردنەوەی ئەستێرەکانی توخێل (2-0) کۆتاییهات.
گۆڵەکانی بلوزی لەندەن بە پێیەکانی حەکیم زەیاشی مەغریبی و ئیمێرسۆنی بەرازیلی لە خولەکەکانی 34 و 95 تۆمارکران.
لە ڕوبەڕوبوونەوەیەکی دیکەدا یانەی بایرن میونشن لە ئالیانز ئارینا میوانداری لازیۆی ئیتاڵی کرد و یارییەکە بە بردنەوەی پاڵەوانانی وەرزی ڕابردوو (2-1) کۆتاییهات.
گۆڵەکانی باڤاری لە خولەکەکانی 33 و 73 لەلایەن ڕۆبێرت لیڤاندۆڤیسکی (پەناڵتی) و ئیریک چوپو مۆتینگ، گۆڵەکەی لازیۆ لە خولەکی 82 لەلایەن مارکۆ پارۆلۆوە تۆمارکران.
بەپێی ئەنجامە تۆمارکراوەکان، یانەی چێڵسی بە کۆی ئەنجامی یاریی چوون و گەڕانەوە (3-0)، هەروەها یانەی بایرن میونشن بە کۆی ئەنجامی (6-2) بلیتی قۆناغی چارەکی کۆتایی خولی یانە پاڵەوانەکانی ئەوروپایان بڕی.
