سەرۆكی پارتی و سەرۆكی دەستەی حەشدی شەعبی و سەرۆك ئەركانی سوپای عێراق ئەمڕۆ یەكشەممە 4ی تشرینی یەكەم كۆبوونەوە، دۆخی ناوچەكانی مادەی 140یان تاووتوێكرد.
بەپێی ڕاگەیەنراوێكی كۆبوونەوەكە، لە دیدارەكەدا بارودۆخی سیاسیی عێراق و ئاڵەنگارییە هەنوكەیی و هەڕەشە ئەمنییەكانی بەردەم سەقامگیریی عێراق و ناوچەكە تاووتوێكران. هەروەها بیروڕا لەبارەی هەماهەنگیی ئەمنی و كاری هاوبەشی هەرێمی كوردستان و حكومەتی فیدڕاڵ بۆ ڕوبەڕوبوونەوەی هەڕەشەكان ئاڵوگۆڕ كران.
لە بەشێكی تری كۆبوونەوەكەدا جەخت لەسەر پێویستی گرتنەبەری هەنگاوی جدی بۆ ئاساییكردنەوەی بارودۆخی ناوچەكانی مادەی 140ی دەستووری عێراق كرایەوە، وەك ئەوەی لە ڕاگەیەنراوەكەدا هاتووە.
لای خۆیەوە بارزانی پشتگیریی خۆی بۆ پڕۆسەی سیاسیی عێراق دووپاتكردەوە و ڕاشیگەیاند كە “سەقامگیریی عێراق بۆ هەرێمی كوردستان جێگەی بایەخە”.
