كەشناسیی هەرێم هاتنی شەپۆلێكی باران بارین رادەگەیەنێت و دەڵێت، تا رۆژی پێنجشەممە بەردەوام دەبێت، كەشوهەوای ئەمڕۆ و سبەینێش رووندەكاتەوە.
بەڕێوەبەرایەتیی گشتیی كەشناسی و بومەلەرزەزانیی هەرێم رایگەیاند، کاریگەریى نزمە پاڵەپەستۆى دەریاى ناوەڕاست لەئێستادا رووى لە ناوچەکەمان کردووە، دەبێتە هۆى شەپۆلێکى باران بارین و بەفر بارین.
بەپێی پێشبینییەكانی كەشناسی شەپۆلەكە تا رۆژى پێنجشەممە لەسەر ناوچەکانی هەرێم بەردەوام دەبێت.
روونیشیدەكاتەوە، کاریگەریى نزمە پاڵەپەستۆى دەریای ناوەڕاست کە بارستە هەوایەکى سارد یاوەرى دەکات لە رۆژانى سێشەممە و چوارشەممە زیاتر دەبێت و پلەکانى گەرما زیاتر روو لە نزمبوونەوە دەکەن.
هەر لەماوەى کاریگەریى ئەم شەپۆلە باران بارین لە کاتى جیاجیا دەبارێت، چڕترین ماوەى دابارین لە رۆژانى سێشەممە و چوارشەممە دەبێت.
دەربارەی كەشوهەوای پێشبینیکراوى 48 کاتژمێرى داهاتووش دەڵێت، ئەمڕۆ ئاسمان بە گشتى نیمچە هەور دەبێت و هەندێ کات هەورى تەواو دەبێت، ئەگەرى هەندێ نمەباران لە هەندێ ناوچە هەیە، لەگەڵ کەمێک بەفربارین لەسەر لوتکەى شاخە بەرزەکان و ناوچە سنوورییەکان. ئەمڕۆ تا رادەیەک کەش جێگیر دەبێت.
سبەینێش ئاسمان هەورى دەبێت، لەگەڵ باران بارین لە تەواوى ناوچەکانی هەرێم و بەفربارین لەسەر ناوچە شاخاوییەکان. ئاستى دابارین لە دواى نیوەرۆ و ئێوارەدا زیاتر دەبێت و، لە شەودا هەندێ جار لێزمە باران دەبێت.
