ئێران لە ساڵیادی کیمیایی بارانی هەڵەبجەدا کۆمپانیا ئەوروپییەکان تۆمەتبار دەکات بەوەی چەکی کوشندەیان بە سەدام فرۆشتووە و ئاسانکاری بازرگانیکردن بەو چەکانەوە هۆکارێک بووە بۆ شەهیدکردنی 5 هەزار هاوڵاتیی لە هەڵەبجە.
محەمەد جەواد زەریف، وەزیری دەرەوەی ئێران لەبارەی ڕوداوەکەوە ڕایگەیاند، ” ڕۆژئاواییەکان مادەی کیمیایی کوشندەیان بە سەدام حسێن فرۆشت، کە زیاتر لە 5 هەزار کەسی مەدەنی بێ تاوانی بە گازی کوشندە کوشت”.
ئاژانسی هەواڵی ئیرنا لەبارەی ساڵیادی کیمیایی بارانی هەڵەبجەوە لە راپۆرتێکدا نوسیویەتی، ” نزیکەی 25 کۆمپانیای ئەوروپایی دەستیان هەبووە لە فرۆشتنی چەکی کوشندە بە حکومەتەکەی سەدام، هاوکات چەندین کەسی عێراقیش لەو پرسەوە تێوەگلاون”.
لەماوەی 8 ساڵی شەڕی نێوان ئێران و عێراقدا، ئێران تۆمەتی ئاڕاستەی ڕۆژئاوا کردووە بەوەی بازرگانی چەکی قەدەغەکراویان لەگەڵ حکومەتەکەی سەدام حسێن کردووە و بەهۆیەوە لە چەندین شوێنی وەک “هەڵەبجە و سەردەشت و شەڵەمچە” کیمیایی باران کراون.
