كەشناسیی هەرێم ڕەوشی كەشوهەوای ئەمڕۆ و سبەی بڵاوكردەوە، هۆشداری دەدات لە زیادبوونی خێرایی با لە سلێمانی و كەركوك.
لە ڕاگەیەندراوێكدا، بەڕێوبەرایەتیی كەشناسی و بومەلەرزەزانیی هەرێم ئەمڕۆ پێنجشەممە 11ی ئازار ئاشكرایكردووە، “هەرێمى کوردستان هەر لەژێر کاریگەریی ئەو شەپۆلە بارانبارینە دەبێت کە ئێستا ڕووى لە ناوچەکەمان کردووە”.
ئەوەشی ئاشكرایكردووە، “ئەمڕۆ خێرایى با زیاد دەکات، لە سنوورى پارێزگاى سلێمانى و کەرکوک خێرایى با زیاتر دەبێت و هەندێك کات دەگاتە سەرووى 40 کیلۆمەتر لە کاتژمێرێکدا”.
كەشناسیی هەرێم ئەوەشی خستوەتەڕوو، “لەگەڵ زیادبوونى خێرایی با ئەگەرى بەرزبوونەوەى تۆز و خۆڵ هەیە”.
سەبارەت بە كەشوهەوای سبەی هەینی، پێشبینی كردووە، “سبەى پلەکانى گەرما بە نزیکەى 5-7 پلەى سیلیزى نزم دەبنەوە، لە کاتەکانى ئێوارەشدا بارانبارین کۆتایى دێت، تەنها لەسەر ناوچە شاخاوییەکان دەمێنێتەوە” .
