پێکھاتەی عەرەب لە پارێزگای کەرکوک، شەوی ڕابردوو 7ی تشرینی یەکەم، داوایانکرد دەستگیرکراوەکانیان کە لەلایەن حکومەتی ھەرێمی کوردستانەوە بەندکراون ئازاد بکرێن، بەوپێیەی “5 هەزار کەسیان دەستگیرکراون”.
نەدیم شەمەری، جێگری سەرۆکی بەرەی عەرەبی یەکگرتوو ڕایگەیاندووە، “5 هەزار کەس لە عەرەبی کەرکوک لەلایەن هێزە ئەمنییەکانی هەرێمی کوردستانەوە دەستگیركراون و بەندکراون”.
نەدیم شەمەری داوای لە حکومەتی هەرێمی کوردستان کردووە، ئەو دەستگیرکراوانە ئازاد بکات یان ڕەوانەی دادگایان بکات و هۆشداریشی داوە لە ئازادنەکردنیان و دەڵێت، “ئەو هەنگاوە زیان بە پەیوەندیی کۆمەڵایەتی لە پارێزگای کەرکوک دەگەیەنێت”.
ئەو بەرپرسەی بەرەی عەرەبی كەركوك ئاماژەی بەوەشکردووە، وێڕای چەندین ساڵ داواکارییان بۆ ئازادکردنی ئەو گیراوانە، بەڵام حکومەتی عێراق بەدەم داواکارییەکەیانەوە نەهاتووە.
ئەمە لەکاتێکدایە، تاوەکو ئێستا حکومەتی فیدراڵی و حکومەتی هەرێمی کوردستان لەمبارەیەوە هیچ ڕوونکردنەوەیەکیان نەداوە.
