بەرپرسانی یانەی مانچستەر یونایتدی ئینگلیزی بڕیاریانداوە لە گواستنەوەکانی هاوینی 2021 دەستبەرداربوون بە داڤید دی خیای گۆڵپارێزی ئیسپانی بدەن.
ماڵپەڕی “90 min”ی بەریتانی ئاشکرایکردووە، بەهۆی بوونی دیان هێندێرسۆنەوە، ئیدارەی یونایتد بڕیاریانداوە دەستبەرداری داڤید دی خیای گۆڵپارێزی ئیسپانی ببن، بەڵام بەهۆی مێژووی یاریزانەکەوە لە لیستی فرۆشراواندا ناونوس ناکرێت، بەڵکو لە ئەگەری گەیشتنی بۆندی گونجاودا دەستبەرداربوونی پێبدەن.
لەم وەرزەدا دیان هێندێرسۆنی لاو توانیویەتی ئاستێکی ناوازە پێشکەشبکات، ئاستە بەرزەکەی پێگەی دی خیای خستووەتە مەترسییەوە و ئولی گۆنار سۆڵشایەر کێشەی نەبووە لە دوورخستنەوەی لە چەندین ڕوبەڕوبوونەوەی گرنگ و چارەنوسسازدا.
دی خیا تاوەکو ئێستا 434 یاری بەدرێسی شەیتانە سوورەکانەوە ئەنجامداوە، یەکێکە لە باشترینەکانی جیهان و هەفتانە بەرزترین موچە بەدەستدەهێنێت کە 375 هەزار پاوەندە، ئەو نرخەش لە ژووری جلگۆڕینەکان کێشەی دروستکردووە و سەقفی موچەی یاریزانانی بەرزکردووەتەوە.
سەرچاوەکان دەنوسن، بەهۆی بەرزی موچەکەیی و دابەزینی ئاستیەوە، ئیدارەی یونایتد دەیانەوێت دی خیا بە یانەیەکی دیکە بفرۆشن و پشت بە هێندێرسۆنی تەمەن 23 ساڵ ببەستن، کە هەفتانە نیو هێندەی موچەی گۆڵپارێزی سەرەکی بەدەستدەهێنێت.
