کۆمسیۆنی باڵای هەڵبژاردنەکانی عێراق دواین ئامارەکانی سەبارەت بە ژمارەی ئەو پارت و هاوپەیمانێتییانە بڵاوکردەوە کە بۆ هەڵبژاردنەکانی مانگی تشرینی دووەم ناویان تۆمارکردووە.
جەمانە گلای، وتەبێژی کۆمسیۆنی باڵای هەڵبژاردنەکانی عێراق ڕایگەیاند کە کۆمسیۆن دەرفەتێکی فراوانی داوە بە لایەن و هاوپەیمانێتییەکان بۆ خۆتۆمارکردن ، لەمەودواش ناو تۆمارکردن بۆ بەشداریکردن لە هەڵبژاردنەکان بەردەوام دەبێت.
ئاماژەی بەوەشکردووە کە تاوەکو ئێستا 249 حزبمان هەیە و 60 حزبیش لە مامەڵەی تۆمارکردندان و 106 حزبیش پێشتر مۆڵەتیان وەرگرتووە بەمەبەستی بەشداریکردن.
جومانە گلای دەڵێت، ژمارەی هاوپەیمانێتییەکان 30 هاوپەیمانێتییە و 10 هاوپەیمانێتی لە مامەڵەی تۆمارکردندان، هەروەها هاوپەیمانێتیی دیکەش هەیە کە دەیانەوێت بەشداری هەڵبژاردن بکەن.
ڕاشیگەیاند، 186 کاندید خۆیان تۆمارکردووە، لەو ژمارەیە 162یان سەربەخۆن و لەناو هیچ حزب و هاوپەیمانێتییەکدا نین، چواریشیان لەناو هاوپەیمانێتییەکاندان و 20یشیان لە 11 حزبی جیاوازدان، هەروەها چوار ئێزدی، چوار فەیلی و پێنج سابیئە لەناو کاندیدەکاندان.
باسیلەوەشکرد کە 17ی نیسان دواین بەروارە بۆئەوەی کاندیدەکان خۆیان تۆماربکەن و دوای ئەوە لیستی تۆمارکردن دادەخرێت، کۆمسیۆن کاتی دیاریکراوی خۆی هەیە بۆ تۆمارکردن و ژماردن و هەڵسەنگاندن پاشان پەسەندکردنی لایەن و کاندیدەکان.
وتیشی، “زیاتر لە 70 هەزار ئامێری وردبینیکردنی ئەنجامەکانی هەڵبژاردنمان هەیە سەرجەمیان نوێن و 63یان کاریان خێراکردنی پرۆسەی دەستخستنی ئەنجامی هەڵبژاردنەکانە، هەروەها تیمێکی تایبەت ڕاهێنانیان پێدەکرێت لە کۆی 83 بنکەدا کاردەکەن”.
