ئەندامێکی لیژنەی ژوری بازرگانیی هاوبەشی نێوان ئێران و عێراق ئاشکرایکردووە ئەمریکا ڕەزامەندیداوە لە ئازادکردنی سێ ملیار دۆلاری بلۆککراو لە سێ وڵاتدا.
حەمید حسێنی، ئەندامی لیژنەی ژوری بازرگانیی هاوبەشی نێوان ئێران و عێراق لە تویتێکدا ئاشکرایکردووە، “ئەمریکا ڕەزامەندیداوە سێ ملیار دۆلاری ئێران کە لە عێراق و کۆریای باشور و عومان بووە ئازاد بکرێت”.
لەگەڵ بڵاوکردنەوەی ئەم هەواڵەدا کەناڵی ئەلجەزیرەی قەتەری ئاشکرایکردووە “بەرپرسانی عێراق بەڵێنیانداوە کە پارە بلۆککراوەکانی ئێران ئازاد بکرێن، بەڵام هێشتا نەچووەتە بواری جێبەجێکردنەوە”.
بڵاوبوونەوەی ئەم هەواڵە لە کاتێکدایە دوێنێ حەسەن ڕۆحانی، سەرۆککۆماری ئێران و مستەفا کازمی، سەرۆکوەزیرانی عێراق لە پەیوەندییەکی تەلەفۆنیدا ئاشکرایان کرد کە هێشتا پارەکانی ئێران ئازاد نەکراوە.
پێشتر ڕاگەیەندرابوو کە یەک ملیار دۆلاری ئێران لە کۆریای باشور ئازادکراوە لە 7 ملیار دۆلار، بەکارهێنانی پارەکەش بۆ کڕینی دەرمان و خواردنە نەک بە ڕاستەوخۆ ئێران بتوانێت بەکاری بهێنێت.
بەهۆی سزاکانی ئەمریکاوە بۆ سەر ئێران، کۆمەڵێک پارەی ئەو وڵاتە لە چەند وڵاتێکی جیاواز بلۆککراوە، لە حاڵەتێکدا ئەگەر ئێران بتوانێت سود لەو پارانە وەربگرێت ئەوا دەبێت لە کڕینی دەرمان و خواردندا خەرجی بکات.
