ئەستێرەی ناوداری یانەی ڕیاڵ مەدرید، لوکا مۆدریچ لە پلانیدایە تاوەکو 2022 لە ڕیاڵ مەدرید بەردەوامبێت و لەدوای ئەو وادەیە وازهێنان ڕابگەیەنێت.
لوکا لەدایکبووی زادارە لە کرواتیا، لە دینامۆ زاگریب دەرکەوت و لە تۆتنهام گەیشتە تۆپکی تواناکانی و لە ڕیاڵ مەدرید ڕێزی تایبەتی لێنرا، بووە یەکێک لە باشترینەکانی جیهان، بەڵام لە ئێستادا تەمەنی 35 ساڵە و چیدی خۆری یاریکردنی لە مەدرید بەرەو ئاوابوون دەچێت.
“کرۆیفی بەڵقان” لە نوێترین چاوپێکەوتندا بە ڕۆژنامەی مارکای ڕاگەیاندووە، ” دەمەوێت بۆندەکەم لەگەڵ ڕیاڵ مەدرید نوێبکەمەوە و لێرە وازهێنان لە تۆپی پێ ڕابگەیەنم”.
ڕۆژنامە ئیسپانییەکە لەم بارەیەوە نوسیویەتی، مۆدریچ لە هاوینی 2021 بۆندەکەی کۆتاییدێت و دەتوانێت بێبەرانبەر پەیوەندی بە یانەیەکی دیکەوە بکات، بەڵام نایەوێت ئەم هەنگاوە بنێت.
هاوشێوەی سێرجیۆ ڕامۆس و لوکاس ڤاسکێز، تاوەکو ئێستا نوێکردنەوەی بۆندی لوکیتا لەلایەن ئیدارەی یانەوە تاووتوێ نەکراوە، یاریزانەکەش خەون دەبینێت لە هاوینی 2021 تەنها تاوەکو هاوینی 2022 بۆندەکەی نوێبکرێتەوە، لەو ساڵەشدا تەمەنی دەبێتە 36 و دوای کۆتاییهاتنی وەرز وازهێنان ڕادەگەیەنێت.
بەپێی زانیارییەکانی مارکا، خێزانی مۆدریچ لە مەدرید بەختەوەرن و فشاریان لەسەر یاریزانەکە دروستکردووە لە ڕیاڵ مەدرید بەردەوامبێت، لە بەرانبەردا ئیدارەی یانە ڕێزێکی تایبەتییان لەم یاریزانە ناوە و بەدوور نازانرێت داواکەی جێبەجێبکەن، تەنانەت یاریزانەکە ئامادەیی دەربڕیوە بە موچە و ئیمتیازاتی کەمتر مامەڵە لەگەڵ فلۆرنتینۆ پێرێز و ستافە کارگێڕییەکەی بکات.
بۆچی بەردەوامبوون؟
مۆدریچ لە هاوینی 2021 دەتوانێت پەیوەندی بە هەر یانەیەکی گەورەی دیکەوە بکات، بەڵام خوستی لەسەر بەردەوامبوونە و ئەمەش بۆ چەند هۆکارێک دەگەڕێتەوە.
یەکەمیان پەیوەندی بە زینەدین زێدانی ڕاهێنەرەوە هەیە، کە هێشتا پێی وایە لەتوانایدایە زیاتر و زیاتر پێشکەشی ڕیاڵ بکات، یەکێکی دیکە لە هۆکارەکان جامی نەتەوەکانی ئەوروپا و مۆندیالی 2022ی قەتەرە.
مۆدریچ دەیەوێت تاوەکو کاتی ئەنجامدانی ئەو دوو پاڵەوانێتییە گەورەیە لەو پەڕی توانا هونەری و جەستەییەکانیدا بێت، کە ئەوەش دەبێتە کۆتا پاڵەوانێتی نێودەوڵەتی بەدرێسی هەڵبژاردەی کرواتیاوە بەشدارییان تیادا دەکات.
