سەرۆکی ڕێکخراوی وڵاتانی هەناردەکاری نەوت (ئۆپیک)، ئەمڕۆ سێشەممە 2ی ئازار ڕایگەیاند کە بازاڕی نەوتی جیهانی تائاستێک جێگیری بەخۆوە بینیوە دوای ئەو داڕمانەی لە ماوەی قەدەغەی هاتوچۆ و ڕێکارە توندەکانی بڵاوبوونەوەی کۆرۆنادا توشیهات.
دیامانتینۆ ئەزیڤیدۆ، “نرخی نەوتی خاو تاڕادەیەک جێگیربووە، جۆڕیک لە هاوسەنگی لەنێوان خستنەڕوو و خواستدا لە بازاڕی نەوتی جیهانیدا هەیە، لەکاتێکدا لە ماوەی ڕابردوودا بەهۆی ڕێکارەکانی کۆرۆناوە خواست لەسەر وزە لەجیهاندا داڕمانی بەخۆوەبینی”.
ئاماژەی بەوەشکردووە، بەهۆی ئەو بارودۆخەی جیهان تووشیبووە و ئەگەری سەپۆلێکی دیکەی کۆرۆنا ئەگەری هەیە خواست لەسەر نەوت تاڕادەیەک کەمببێتەوە بەهۆی ڕێکاری قەدەغەی هاتوچۆوە.
جەختیشیکردەوە کە لەگەڵ بەردەوامی و تەواوبوونی هەڵمەتەکانی دابەشکردنی فاکسینی دژە کۆرۆنا و کوتانی دانیشتوانی جیهان جارێکی دیکە خواست لەسەر نەوت بەرزدەبێتەوە.
