تەقینەوەیەك لە شوێنی باڵەخانەیەكی نزیك لە وێستگەی سەرەكی شەمەندەفەر لە شاری میونخ لە باشووری ئەڵمانیا چوار برینداری لێكەوتەوە. هۆكاری تەقینەوەكە بەركەوتنی ئامێرێكی هەڵكەندن بووە بە بۆمبێكی نەتەقیووی پاشماوەی جەنگی جیهانیی دووەم.
پۆلیسی ئەڵمانیا ڕایگەیاند، ڕووداوەكە دوێنێ لە شوێنی بونیادنانی باڵەخانەیەك سەر بە كۆمپانیای هێڵی ئاسنینی (دوێتچە بان) بووە و بەپێی وتەی تیمەكانی بەهاناوەچوون چوار برینداری لێكەوتووەتەوە، سیانیان برینەكانیان سوكە و یەكێكیان مەترسیدارە.
دوای تەقینەوەكە جموجوڵی شەمەندەفەر بۆ وێستگەی سەرەكیی میونخ و لەوێشەوە بۆ دەرەوە بۆ چەند كاتژمێرێك ڕاگیرا.
بەپێی میدیاكانی ئەڵمانیا كێشی بۆمبەكە 250 كیلۆگرام بووە.
یواخیم هیرمان، وەزیری ناوخۆی ویلایەتی باڤاریا پاش سەردانكردنی شوێنی ڕووداوەكە وتی، لێكۆڵینەوە دەكرێت لەبارەی هۆكاری ئاشكرانەكردنی بۆمبەكە بەر لە كاری هەڵكۆڵین.
بەشێوەیەكی گشتی لە ناوەندی شاری میونخ بەر لە كاری هەڵكۆڵین پشكنینی ورد و ڕێكخراو لە شوێنی بونیادنانی هەر باڵەخانەیەك دەكرێت، بۆ زانینی بوونی هەر جۆرە تەقەمەنییەكی سەردەمی جەنگی جیهانی.
