دوای ئەوەی لە دوو ڕۆژی ڕابردوودا فوئاد حسێن، وەزیری دەرەوەی عێراق سەردانی سعودییەی کردبوو، بەیانی ئەمڕۆ 27 شوبات گەیشتە تاران و لەگەڵ بەرپرسانی ئەو وڵاتە کۆبوویەوە.
میدیا ئێرانییەکان ئاشکرایان کردووە، فوئاد حسێن، وەزیری دەرەوەی عێراق لەگەڵ عەلی شەمخانی، سکرتێری ئەنجومەنی باڵای ئاسایشی نیشتمانیی ئێران، کۆبووەتەوە و چەند پرسێکی هەنوکەیی و ناوچەی تاوتووێ کراوە.
دوای کۆبوونەوە لەگەڵ عەلی شەمخانی، فوئاد حسێن لەگەڵ محەمەد جەواد زەریف، وەزیری دەرەوەی ئێران کۆبوویەوە و لە کۆبوونەوەکەدا پرسی ئەمنیەتی ناوچەکە و ڕۆڵی هەردوو وڵات لە گۆڕانکارییەکاندا باسی لەبارەوە کراوە.
ئەگەرچی میدیا ئێرانییەکان باسیان لە هیچ پەیامێکی سعودی نەکردووە بۆ ئێران، بەڵام گەشتی فوئاد حسێن ڕاستەوخۆ دوای گەڕانەوەی لە سعودییەوە بۆ ئێران چەند خوێندنەوەیەک هەڵدەگرێت کە یەکێک لە ئەگەرەکان پرسی پەیوەندی ئێران و سعودیەیە بە نێوەندگیری عێراق.
سەردانی فوئاد حسێن بۆ تاران دووەم سەردانیەتی بۆ ئێران دوای ئەوەی وەک وەزیری دەرەوەی وڵاتەکەی دەستبەکاربوو.
