فوئاد حسێن، وەزیری دەرەوەی عێراق و شاندێکی یاوەری بە سەردانێکی فەرمی گەیشتە تارانی پایتەختی کۆماری ئیسلامیی ئێران و لەگەڵ بەرپرسانی باڵای ئەو وڵاتە کۆدەبێتەوە.
ئەحمەد سەحاف، وتەبێژی وەزارەتی دەرەوەی عێراق ڕایگەیاند، “سەردانەکەی فوئاد حسێن ڕۆژێکی پێدەچێت و بڕیارە لەگەڵ گەورە بەرپرسانی ئێران کۆببێتەوە”.
وتیشی، “وەزیری دەرەوەی عێراق لە کەسایەتییە باڵاکانی ئێران گفتوگۆی پەیوەندییە دووقۆڵییەکانی هەردوو وڵات دەکەن و تاوتوێی بارودۆخی ناوچەکە دەکەن”.
ئاماژەی بەوەشکرد کە هەریەکە لە بەغداد و تاران پاڵپشتییەکانیان بۆ کەمکردنەوەی ئاڵۆزییەکان و هەنگاوەکانی بەدواداچوونی ئەو ئاڵۆزییانە یەکدەخەن.
ئەم سەردانەی وەزیری دەرەوەی عێراق بۆ وڵاتی ئێران دوای ئەوە دێت کە لە 22ی شوبات سەردانێکی بۆ وڵاتی سعودییەش ئەنجامدا.
