كۆشكی سپیی ئەمریكا ڕایگەیاندووە، كازمی و بایدن لە پەیوەندییەكی تەلەفۆنیدا تاووتوێی هێرشە موشەكییەكانی ناوخۆی عێراقییان كردووە و ڕێككەوتن لەسەر سزادانی ئەو كەسانەی بەرپرسن لەو هێرشانە.
ئەمڕۆ چوارشەممە 24ی شوبات، لە ڕاگەیەندراوێكدا كۆشكی سپیی ئەمریكا ڕایگەیاندووە، جۆ بایدن، سەرۆكی ئەمریكا و مستەفا كازمی، سەرۆكوەزیرانی عێراق گفتوگۆیان لەبارەی هێرشە موشەكییەكان ئەمدواییانەی سەر هێزە عێراقییەكان و هێزی هاوپەیمانی كردووە و ڕێككەوتوون لەسەرە ئەوەی “ئەو كەسانەی بەرپرسن لەو هێرشانە سزا بدرێن”.
لای خۆشییەوە لە تویتێكدا درەنگانێكی ئەمشەو، مستەفا كازمی ئاماژەی بەوەكردووە، “لە پەیوەندییەكدا لەگەڵ سەرۆك جۆ بایدن، تاووتوێی پەرەپێدانی پەیوەندییە دوو قۆڵییەكان و بەهێزكردنی هەماهەنگیی هاوبەشمان كرد”.
ئەوەشی خستوەتەڕوو، “ڕێككەوتین كار بكەین بۆ چەسپاندنی ئاشتی و ئاسایش لە ناوچەكە و پێكەوە شەڕی داعش بكەین و جەختمان كردەوە لە درێژەپێدانی گفتوگۆی ستراتیژیی نێوان هەردوو وڵات”.
لە پەیوەندییەكدا لەگەڵ سەرۆك جۆ بایدن، تاوتوێی پەرەپێدانی پەیوەندییە دوو قۆڵییەكان و بەهێزكردنی هەماهەنگی هاوبەشمان كرد، رێككەوتین كار بكەین بۆ بۆ چەسپاندنی ئاشتی و ئاسایش لەناوچەكە و پێكەوە شەڕی داعش بكەین.
جەختمان كردەوە لە درێژەپێدانی گفتوگۆی ستراتیژیی نێوان هەردوو وڵات.— Mustafa Al-Kadhimi مصطفى الكاظمي (@MAKadhimi) February 23, 2021
