سەرۆککۆماری تورکیا گلەیکرد کە ئەمریکا و ناتۆ وەک هاوپەیمانی وڵاتەکەی هاوکارییان نەکردووە بۆ هێرشکردنە سەر پەکەکە، لە کاتێکدا پەکەکە لەناو ئەمریکاش ڕۆڵی هەبووە لە هێرشکردنە سەر کۆنگرێسی ئەو وڵاتە.
ڕەجەب تەیب ئەردۆغان، سەرۆککۆماری تورکیا لە کۆتا وتاریدا سەبارەت بە دۆستایەتی وڵاتەکەی و ئەمریکا ڕایگەیاندووە، ” ئێمە سەردەمێکمان تێپەڕاند کە تێیدا دۆستی ئێمە و ئەمریکا بە شێوەی جیدی تاقی کرایەوە، ئێمە لەلایەن هاوپەیمانەکانەوە لە ناتۆ، بۆ شەڕ لەگەڵ پەکەکە پاڵپشتی نەکراین، لەکاتێکدا پەکەکە مەترسییە بۆسەر جیهان”.
لە وتەکانی سەرۆککۆماری تورکیادا هاتووە، “پەیوەندی لقی پەکەکەی سوریا / یەپەگە، لەگەڵ ئەو کەسانەی هێرشیانکردە سەر بینای کۆنگرێس دەرکەوتووە و جارێکی دیکە ئەوە سەلماندنی کە تیرۆر لەگەڵ مرۆڤایەتی و دیموکراسی دوژمنە”.
کۆی ناکۆکییەکانی نێوان تورکیا و ئەمریکا جگە لە پەیوەست بە ڕوسیاوە، هەمووی لەسەر کوردانی ڕۆژئاوایە و ئەو هاوکارییەیە کە ئەمریکا بۆ هێزەکانی سوریای دیموکراتی دەنێرێت.
تورکیا هەمیشە بە ئەمریکا دەڵێت یەپەگە و پەکەکە جیاوازیان نییە و ئەمریکا لەسەر ئەوە ناکۆکە لەگەڵ تورکیا.
