وتەبێژی پۆلیسی هەولێر رایگەیاند، دوو کەسیان دەستگیرکردووە کە تۆمەتبارن بە دزینی حەوت ئۆتۆمبێل لە رابردوودا.
هۆگر عەزیز وتەبێژی پۆلیسی هەولێر لە کۆنگرەیەکی رۆژنامەوانیدا رایگەیاند، “لە دوو هەڵمەتی جیاوازدا هێزەکانمان دوو کەسیان دەستگیرکردووە کە تۆمەتبارن بە دزینی حەوت ئۆتۆمبێل لە رابردوودا، کە یەکێک لە تۆمەتبارەکان پێشینەی دزینی ئۆتۆمبێلی براکەی هەبووە.”.
ئاماژەی بەوەش کرد، “تۆمەتبارەکان پێشینەی تاوانیان هەیە و ماوەیەکی بووە لە زیندان ئازادبوون”.
ئاشکراشی کرد، “توانراوە دەست بەسەر ئۆتۆمبێلە دزراوەکاندا بگیرێت و رادەستی خاوەنەکانیان بکرێنەوە”.
بە وتەی هۆگر عەزیز لە سەرەتای ئەمساڵەوە تا ئێستا لە سنووری پارێزگای هەولێر 32 ئۆتۆمبێل دزراون لەو ژمارەیەش دەست بەسەر 30 ئۆتۆمبێلیاندا گیراوە و رادەستی خاوەنەکانیان کراونەتەوە و دووانەکەی دیکەش لە ژێر لێکۆڵینەوەدان.
