وەزارەتی تەندروستیی ئیسرائیل ڕایگەیاند کە مەترسیی توشبوون بە ڤایرۆسی کۆرۆنا COVID-19 لەو کەسانەی ژەمی دووەمی ڤاکسینەکەیان وەرگرتووە بەڕێژەی %95.8 کەم بووەتەوە.
وەزارەتی تەندروستیی ئیسرائیل، ئەمڕۆ یەکشەممە 21ی شوبات ڕایگەیاند، “ڤاکسینەکە بەڕێژەی %98 چالاکە لە ڕێگریکردن لە تا و کێشەکانی هەناسەدان، بەڕیژەی %98.9یش چالاکە لە داخڵکردن لە نەخۆشخانە و گیانلەدەستدان.
بەپێی ئەنجامەکان تاوەکو بەرواری 30ی کانونی دووەم نزیکەی 1.7 ملیۆن کەس لە ئیسرائیل ژەمی دووەمی ڤاکسینی کۆرۆنایان وەرگرتووە
بنیامین نەتنیاهۆی سەرۆکوەزیرانی ئیسرائل، دوێنێ شەممە ڕایگەیاند کە پێشبینی دەکەن %95ی ئەو هاوڵاتییانەی ئیسرائیل کە تەمەنیان لە 50 ساڵ بەرەوسەرەوەیە لە دوو هەفتەی داهاتوودا پرۆسەی کوتانیان کۆتاییپێبێت.
ڕاپۆرتەکانی ئەو وڵاتە لەسەر تەندروستی تاک و ئەنجامە ئیجابییەکانی بەدەستهاتوو لە ئەنجامی هەڵمەتەکانی کوتان وای لەو وڵاتە کردووە ڕێکارەکانی پەیوەست بە کۆرۆنا و ڕێکارە ئابورییەکان هەڵبگرێت و ئەمڕۆش بڕیاری کردنەوەی قوتابخانەکان و شوێنە بازرگانییەکانیدا.
