ئیدارەی جۆ بایدن دەڵێت، هیچ مەرجێكی پێشوەختەی نییە بۆ تاوتوێكردنی پرسی گەڕانەوەی ئەمریكا و ئێران بۆ گەڕانەوە بۆ ڕێككەوتنی ئەتۆمی.
نید برایس، وتەبێژ بەناوی وەزارەتی دەرەوەی ئەمریكا ڕۆژی هەینی 20ی شوبات وتی، “باس لە مەرجی پێشوەختە دەكرێت، بەڵام ئێمە ڕامانگەیاند كە دەمانەوێت لەسەر مێزی گفتوگۆ لەگەڵ ئێرانییەكان دانیشین لە چوارچێوەی كۆمەڵەی (5+1)، كە وڵاتە ئەندامە هەمیشەییەكانی ئەنجومەنی ئاسایشی نێودەوڵەتی و ئەڵمانیا لەخۆدەگرێت”.
برایس ئاماژەی بە ویستی ویلایەتە یەكگرتووەكانیش كرد بۆ بەشداری لە كۆبوونەوەیەك كە یەكێتی ئەوروپا ئەنجامیدەدات و دوپاتیكردەوە “هیچ مەرجێكی پێشوەختە لەو ڕوەوە نییە”.
ڕۆژی پێنجشەممە ئەنتۆنی بلینكن، وەزیری دەرەوەی ئەمریكا بە وڵاتانی بەریتانیا، فەڕەنسا و ئەڵمانیای ڕاگەیاند كە ئیدارەی جۆ بایدن، سەرۆكی ویلایەتە یەكگرتووەكان ئامادەی وتوێژە لەگەڵ ئێران دەربارەی گەڕانەوەی هەردوو وڵات بۆ پابەندبوون بە ڕێككەوتنی ئەتۆمیی واژۆكراو لە ساڵی 2015 كە ئامانج لێی ڕێگریكردن لە تارانە لە پەرەپێدانی چەكی ئەتۆمی.
س: ئاژانسەكان
