نێچیرڤان بارزانی لەسەر سزای دەستگیرکراوەکانی بادینان ڕاگەیەندراوێکی بڵاوکردەوە

سەرۆکی هەرێمی کوردستان لەسەر سزای شەش ساڵ زیندانی بۆ دەستگیرکراوەکانی بادینان ڕاگەیەندراوێکی بڵاوکردەوە و دەڵێت، ئەوە کۆتا بڕیار نییە.

نێچیرڤان بارزانی، سەرۆکی هەرێمی کوردستان لە ڕاگەیەندراوێکدا، ئەمڕۆ 18 ی شوبات ڕایگەیاند، ” بڕیاری دادگا بۆ سزادانی چەند ڕاگیراوێک نيگه‌رانى دروست کردووە، بەڵام ئەوە دوا بڕیار نییە، بەپێی یاسا، مافى سزادراوانه‌ تانە لە بڕیاره‌كە بده‌ن، دادگای پێداچوونەوەش ئەرکیەتی بە پشتبەستن و ڕێزگرتن لە یاسا و مافەکانی مرۆڤ و مافی یاسایيی سکاڵالێکراو و سکاڵاکار، بە کەیسه‌كه‌دا بچێتەوە تا هەمووان هەست بکەن وەک یەک مافيان پارێزراوە”.

سەرۆکی هەرێم لە ڕاگەیەندراوەکەیدا دەڵێت، ” لای خۆمانەوە چاودێريی ئەو پرسە دەکەین، جەخت لە سەروەریی یاسا و ڕێزگرتن لە سەربەخۆیيی بڕیاری دادگا و لە پرەنسیپەکانی مافی مرۆڤ دەکەینەوە. دەبێت یاسا سەروەر بێت و هیچ لایەن و کەسێک مافی دەستوەردانیان لە کاروباری دادگادا نییە”.

نێچیرڤان بارزانی نوسیویشیەتی، ” گەلی كوردستان هه‌رگيز پاشەکشە لە ئازادی ناكات، ڕێگەش نادرێت ئازادى بۆ لەباربردنی خودی ئازادی، خراپ بەکار بهێنرێت، پاراستن و چەسپاندن و پەرەپێدانی ئازادی و دیموکراسی، بريتييه‌ له‌ سەروەريی یاسا و سەربەخۆیيی دادگا، سەربەخۆیيی دادگاش لە چۆنیەتيی کاری دادگا و دادوەرانەوە دەبینرێت، دادگا و دادوەرانى به‌ڕێز دەبێت شکۆی سەربەخۆییى خۆيان لەپێناو سه‌روه‌ريى یاسادا بپارێزن، تا شکۆی مرۆڤ و شکۆی وڵات لە سایەی شکۆی یاسادا پارێزراو بێت”.

لە ڕاگەیەندراوەکەی سەرۆکی هەرێمدا ئاماژە بەوەشکراوە، ” داوا لە هه‌موو لایەك دەکەم لەگەڵ ماف و ئازاديیان لە ڕەخنەگرتن و له‌‌ دروستکردنی فشاری مەدەنیانە بەرانبەر هەر بڕیارێک، كارێكى وا نه‌كه‌ن بێمتمانەیی بە دادگا و یاسا و هەرچی دامودەزگایە دروست بکرێت، چونکە بێمتمانەیی بە سه‌روه‌ريى یاسا، وا ده‌كات ئیتر کەس لە سەر و ژیان و کەرامەت و ماڵ و سامان و داهاتووی خۆى، دڵنيا نه‌بێت. با ڕەخنە و کارەکانمان بۆ باشترکردن و سەروەرکردنی یاسا بێت، بۆ ڕووخاندنی متمانەی خەڵک نەبێت بە یاسا و دادگا و دامەزراوە فەرمییەکان”.

بابەتی پێشتر

ناتۆ چالاکی و سەربازەکانی لە عێراق زیاد دەکات

بابەتی دواتر

تەمومژ و بەفر و باران و سەرما دۆخی كەشوهەوای ئەمشەوی هەرێم دەبن

بابەتی پەیوەندیدار
Total
2
Share