بافڵ تاڵەبانی، ھاوسەرۆکی یەکێتیی نیشتمانیی کوردستان لە دەباشان پێشوازی لە ئۆلیڤیێ دیکوتینێ، کونسوڵی گشتیی فەرەنسا لە ھەرێمی کوردستان کرد.
لە دیدارێکدا کە ژمارەیەک لە ئەندامانی دەستەی کارگێڕی و مەکتەبی سیاسیی یەکێتی ئامادەیبوون، سەبارەت بە پەرەسەندنە سیاسی، ئەمنی و ئابورییەکانی ناوچەکە و گفتوگۆکانی ھەرێم و بەغداد بۆ چارەسەرکردنی کێشەکان گفتوگۆ کرا و بافڵ تاڵەبانی سەرنجی خۆی خستەڕوو و ھەنگاو و ئاڕاستە دبلۆماسی و ئیدارییەکانی یەکێتی ئاشکراکرد و ڕێگاچارەکانی چارەسەرکردنی کێشەکانی نێوان ھەولێر و بەغدادی بۆ کونسوڵی فەرەنسا ڕوونکردەوە.
ھاوسەرۆک ڕاشیگەیاند، “یەکێتی مێژووی سیاسی، خەبات و پێگەی خۆی ناکاتە قوربانی ھیچ بەرژەوەندییەکی حزبی و تاکەکەسی” و جەختیشی کردەوە “ھەر بڕیار و جووڵەیەکی سیاسی و ئیداری کە لە بەرژەوەندی گشتی بێت و کاریگەریی ئەرێنی لەسەر ژیان و گوزەرانی خەڵک هەبێت، یەکێتی وەک پرسێکی نیشتمانی مامەڵەی لەگەڵدا دەکات و هەمیشە خۆی لەبەرەی خەڵکدا دەبینێتەوە.”
