بەهۆی پەیوەندیەکی تەلەفونیەوە، ڤینیسیۆز جونیۆر دڵی زینەدین زێدانی ڕاهێنەری ڕیاڵ مەدرید دەداتەوە و پێگەی خۆی لە پێکهاتەی یانەکە بەهێزتردەکات.
ڕۆژنامەی ئاسی ئیسپانی ئاشکرایکردووە، وەرزی ڕابردوو لە ڕوبەڕوبوونەوەی نێوان ڕیاڵ مەدرید و مانچستەر سیتی، ڤینیسیۆز جونیۆری بەرازیلی ڕێنماییەکانی زێدانی پشتگوێخست، تەنانەت ئامادەنەبووە مەشقی خۆگەرمکردنەوە ئەنجامبدات و ئەوەش زێدانی توڕەکرد.
بەپێی سەرچاوەکە، زێدان لە “ڤینی” توڕەبووە و بە دوورخستنەوەی لە پێکهاتەکانی بڕیاری سزادانیداوە، بەڵام لێرەدا یاریزانەکە هەستی بە هەڵەیەک کردووە و بڕیاریداوە دۆخەکە ڕاستبکاتەوە.
ئاس نوسیویەتی، ئەستێرەکەی سیلیساو لە کاتی حەوانەوەکاندا پەیوەندی بە زێدانەوە کردووە و سەبارەت بە هەر هەڵەیەک کە کردویەتی داوای لێبوردنی کردووە، بەڵێنیشیداوە هەرچی لە توانایدابێت بیکات لە پێناو ڕاستکردنەوەی هەڵەکە و پێشکەشکردنی ئاستێکی بەرز.
لە بەرامبەردا “زیزۆ” بە زوبانی پۆرتوگالی پێی وتووە، “تۆ کەسێکی بوێر و ئازایت کە دانت بەهەڵەی خۆتدا نا، بەڵام چیتر هەڵەکە بە هەڵەی خۆم دەزانم”، کە ئەوەش وەک لێبوردەیی ڕاهێنەرەکە و نیازپاکیەتی و جەمسەرەکان لەسەر ئەوە ڕێککەوتوون بەیەکەوە پەیوەندی نێوانیان توندوتۆڵ بکەن.
لەم وەرزەدا ڤینیسیۆز بۆ حەوت ڕوبەروبوونەوە چانسی یاریکردنی بەشێوەی سەرەکی پێدراوە، لە سەرجەمیاندا مێرەنگیەکان براوەبوون و گەوهەرەکەی بەرازیل سێ گۆڵ و سێ ئەسیستی تۆمارکردووە.
