ڕاهێنەری یانەی لیڤەرپوڵ، یۆرگن کلۆپ لە پلانیدا نییە دەستبەرداری یانەکەی بێت، یاخود حەوانەوە وەربگرێت.
دوای ئەوەی میدیاکانی بەریتانیا بڵاویانکردەوە، کە یۆرگن کلۆپی ئەڵمانی هەست بە بێزاری دەکات و لە کۆتایی وەرزدا یان پێشوەخت دەست لە پۆستەکەی دەکێشێتەوە، ڕاهێنەرەکە بە توندی وەڵامی ئەو پڕوپاگەندانەی دایەوە و ڕایگەیاند، ” بەوپەڕی وزەوە بەردەوام دەبم”.
ڕاهێنەرە کارامەکەی “ڕێدز” لە پرێس کۆنفرانسێکدا ڕایگەیاند، ” پێویستم بە حەوانەوە نییە، کۆتا شت بمەوێت باسی بکەن بابەتە تایبەتیەکانە، هەمووان دەزانن بە بارودۆخێکی ناخۆشدا تێپەڕدەکەین، بەڵام ئەوە بۆ سێ هەفتە نییە و دەمێکە بەردەوامە، ئێمە لەگەڵ فشارەکاندا ڕاهاتووین”.
هەروەها دەڵێت، ” 30 ساڵە لە بواری ڕاهێنان کاردەکەم و دەزانم چۆن مامەڵە لەگەڵ بارودۆخەکاندا دەکەم، بێگومان هەموومان بە بارودۆخی یانە خەمباربووین و کاریگەری لەسەرمان هەبووە، بەڵام پێویست ناکات کەس خۆی تووشی دڵەڕاوکێ بکات، ڕەنگە بەهۆی کەشوهەواوە پێمەوە دەرنەکەوێت، بەڵێ کەم دەخەوم، بەڵام دڵنیابن پڕم لە وزە و دۆخەکە بە ئاڵنگارییەک دەبینم، وای دەبینم ئەوەی ڕوودەدات ئاڵنگاریەکی بەهێزە و دەبێت سەرکەوین بەسەریدا”.
لە کۆتا ڕوبەڕوبوونەوەی لیڤەرپوڵ بەرانبەر لیستەر سیتی (3-1) دۆڕاندنیان تۆمارکرد، لە دوای یارییەکە کلۆپ ڕایگەیاند، کە چانسی بەدەستهێنانی نازناوی پریمەرلیگی ئەم وەرزەیان لەدەستداوە، ئەوەش دوای ئەوەی بە 13 خاڵ کەوتنە دوای مانچستەر سیتی یەکەمی ڕیزبەندی.
