دکتۆر یاد نەقشبەندی، بەڕێوبەری نەخۆشخانەی هیوا لە سلێمانی ئەمڕۆ دووشەممە 15ی شوبات ڕایگەیاند کە بەشێکی نوێ لە قاوشی منداڵانی توشبوو بە شێرپەنجە دەکەنەوە کە تایبەتە بە یاریکردن و کاتبەسەربردنی منداڵان، داواشیکرد ڕێگە نەدرێت نەخۆشخانەکانی شێرپەنجە بدرێت بە کەرتی تایبەت و بازرگانی بە توشبووانی شێرپەنجەوە نەکرێت.
لە کۆنگرەیەکی ڕۆژنامەوانیدا دکتۆر یاد ڕایگەیاند، “ئەمڕۆ لە ڕۆژی جیهانیی شێرپەنجەی منداڵاندا بەشێکی نوێ لە قاوشی منداڵانی توشبووی شێرپەنجە دەکەینەوە کە تایبەتە بە یاریکردن و کاتبەسەربردنی ئەو منداڵانەی کە سەردانی نەخۆشخانەکەمان دەکەن بۆ چارەسەرکردن یان سەردانی پزیشک دەکەن و زیاتر لە دوو بۆ سێ کاتژمێر دەمێننەوە”.
سەبارەت بە ئامارەکانی تووشبووانی شێرپەنجە بەڕێوبەری نەخۆشخانەی هیوا وتی، “لە ساڵی 2020دا بەهۆی بڵاوبوونەوەی ڤایرۆسی کۆرۆنا و ڕیکارە تەندروستییەکان لەسەرتاسەری جیهاندا ئامارە تۆمارکراوەکانی توشبووانی شێرپەنجە کەمیکردووە و ڕاست و دروست نەبوون”
ئاماژەی بەوەکرد، “لە نەخۆشخانەکەی ئێمە 2543 توشبووی شێرپەنجە تۆمارکراوە کە شێرپەنجەی مەمک لە پلەی یەکەمدایە لەو ژمارەیەی تۆمارکراوە %60 – 70ی لە پاڕیزگای سلێمانی و هەڵەبجە بووە و %30 لە پارێزگاکانی باشور و ناوەڕاست و پارێزگاکانی دیکەی هەرێمی کوردستان بووە”.
هەروەها لە منداڵاندا 178 توشبووی نوێ تۆمارکراون کە لەو ژمارەیە %45 ی لە پارێزگای سلێمانی و هەڵەبجە بووە، لە %40ی لە پارێزگاکانی ناوەڕاست و باشوری عێراق بوون و %15 -20یشی لە پارێزگاکانی دیکەی هەرێمی کوردستان بوون.
بەپێی ئامارەکانی نەخۆشخانەی هیوا ئەو منداڵانەی توشبووی شێرپەنجەن و لەو نەخۆشخانەیە چارەسەر وەدەگرن منداڵانی پارێزگاکانی ناوەڕاست و باشووری عێراقن، دکتۆر یاد وادەڵێت.
ڕاشیگەیاند کە زۆرترین توشبووی شێرپەنجە لە منداڵاندا جۆری شێرپەنجەی خوێنە و دوای ئەویش شێرپەنجەی گرێی سەر لە پلەی دووەمدا دێت.
ئەو بەرپرسە تەندروستییە داوای کرد کە ڕێگریبکرێت لەوەی کەرتی نەخۆشی شێرپەنجە بدرێت بە لایەنی ئەهلی و کەرتی تایبەت و وتی، “بازرگانیکردن بە توشبووانی شێرپەنجەوە جەریمەیە”.
ئەمڕۆ 15ی شوبات لە جیهاندا وەک ڕۆژی جیهانی شێرپەنجەی منداڵان دیاریکراوە و لەسەر ئاستی جیهان بۆنە و هۆشیاری تەندروستی لەوبارەیەوە بڵاودەکرێتەوە بۆ منداڵان و دایک و باوکان.
