وەزیری تەندروستی: لە کۆتایی ئەم مانگەدا ڤاکسین دەگاتە عێراق و پشکی هەرێمیشی تێدایە

دکتۆر سامان بەرزنجی، وەزیری تەندروستیی هەرێمی کوردستان ئەمڕۆ یەکشەممە 14ی شوبات ڕایگەیاند کە لە کۆتایی ئەم مانگە و سەرەتای مانگی داهاتوودا بەشێک لە ڤاکسینی کۆرۆنا دەگاتە عێراق و پشکی هەرێمی کوردستانیشی تێدایە.

لە کۆنگرەیەکی ڕۆژنامەوانیدا وەزیری تەندروستیی هەرێمی کوردستان ڕایگەیاند، “هەڵکشانی ئامارەکانی توشووانی کۆرۆنا تەنها بەهۆی کردنەوەی دەرگای قوتابخانەکان نییە و ناکرێت ئەو بکرێت بە هۆکار بەڵکو هاتوچۆی نێوان شارەکان و هاتوچۆی نێوان هەرێم و شارەکانی ناوەڕاست و باشوری عێراق هۆکارن، هەروەها ئێستا لە دنیادا ژمارەی توشبوون و گیانلەدەستدان بەرزبوونەتەوە و عێراقیش هاوشێوەی وڵاتانی دیکەیە”.

دکتۆر سامان بەرزنجی وتیشی، “پابەندنەبوونی هاوڵاتییان بە ڕێکارەکانی خۆپارێزی و ڕێنماییەکانی وەزارەتی تەندروستی مەترسییەکی سەرەکییە بۆ بڵاوبوونەوە و تەشەنەسەندنی کۆرۆنا لە هەرێمی کوردستان، لەمبارەیەوە هۆشداریمانداوە تاوەکو هاوڵاتییان لانیکەم ڕێنماییەکان پەیڕەو بکەن بۆئەوەی ئەگەر جارێکی دیکە ژمارەکان بەرزبوونەوە لانی کەم لەپڕ ژمارەیەکی زۆر لە هاوڵاتییان توشنەبن و لەکۆنترۆڵ دەرنەچێت”.

سەبارەت بە ڤاکسینی کۆرۆنا وەزیری تەندروستی دەڵێت، “لە کۆتایی مانگی شوبات یان سەرەتای مانگی ئازاردا کاروانی یەکەمی ڤاکسینەکە دەگاتە عێراق و هەرێمی کوردستانیش پشکی لەو ڤاکسینەدا هەیە، هەروەها کونسوڵخانەی چین  پێنج هەزار ژەمە ڤاکسین بۆ هەرێمی کوردستان دابین دەکات”.

ئاماژەی بەوەشکرد کە وەزارەتی تەندروستی لەڕێگەی شارەزایان و پسپۆرانەوە گروپ و تەمەنەکانیان جیاکردووەتەوە کە پێویستە ڤاکسین وەربگرن و ئامادەکارییەکانیش بۆ ئەو مەبەستە کراون.

بابەتی پێشتر

سوپای پاسداران مانۆڕی سەربازی لەسەر سنووری هەرێم ئەنجامدەدات

بابەتی دواتر

بڕیاری "دوو ساڵ زیندانیكردنی توند" بۆ وەزیرێك و بەڕێوبەرێكی پێشووتر دەركرا

بابەتی پەیوەندیدار
Total
0
Share