وەزارەتی بەرگریی تورکیا، ئەمڕۆ پێنجشەممە 11ی شوبات ڕایگەیاند کە لە ئۆپەراسیۆنی چنگی هەڵۆ-2 بۆسەر پەکەکە دوو سەربازیان کوژراون و چواری دیکەشیان برینداربوون.
لە ڕاگەیەنراوێکدا وەزارەتی بەرگریی تورکیا ڕایگەیاند، لە ئۆپەراسیۆنی چنگی ھەڵۆ-2 کە لە ناوچەی گارەی سەربە پارێزگای دهۆکی هەرێمی کوردستان لە دژی پەکەکە دەستیپێکردووە، دوو سەربازی سوپای تورکیا لە یەکەی کۆماندۆی پیادە بە ناوەکانی بوراک چۆشکن و ھاروون تورھان لە شەڕ و پێکدادانێکدا کوژراون.
لەڕاگەیەنراوەکەی وەزارەتی بەرگریدا هاتووە کە لە ئەنجامی شەڕ و ڕوبەڕوبوونەوەی نێوان سوپای تورکیا و پەکەکە چوار سەربازی دیکەیان برینداربوون.
ئەمە لەکاتێکدایە دوێنێ چوارشەممە وەزارەتی بەرگریی تورکیا دابەزاندنی سوپای وڵاتەکەی لە چیای گارەی پارێزگای دهۆک لە هەریمی کوردستان ڕاگەیاند و ئاشکراشیکرد کە دەستیان بە ئۆپەراسیۆنی چنگی هەڵۆ-2 دژ بە پەکەکە کردووە.
پێشتریش وەزیری بەرگریی تورکیا لە سەردانیدا بۆ عێراق و هەرێمی کوردستان داوای هەماهەنگی هەردوولای کردووە بۆ ڕوبەڕوبوونەوەی پەکەکە.
