بەپێی ئەو زانیارییانەی لە بەڕێوەبەرایەتیی دابەشكردنی بەرهەمە نەوتییەكانی سلێمانییەوە بە تۆڕی میدیایی ئێستا دراون، ئەمڕۆ یەكشەممە نرخی بەنزین لە بەنزینخانەكاندا زیاتر بەرزبووەوە و یەك لیتر بەنزینی نۆڕماڵ گەیشتە هەزار و 200 دینار.
ئاماژە بەوەشكراوە، سەرجەم جۆرەكانی بەنزین لەمڕۆوە 50 دیناری دیكە چووەتە سەر نرخەكانیان و بەیانی ئەمڕۆ نرخی یەك لیتر بەنزینی نۆڕماڵ هەزار و 150 دیناربووە و ئێستا نرخەكەی بووە بە هەزار و 200 دینار.
لە زانیارییەكاندا هاتووە، بەنزین لە هیچ دەروازەیەكەوە هاوردە ناكرێت و پاڵاوگەكانیش وەك پێویست خواستی ناوخۆ پڕناكەنەوە و ئەگەر ڕۆژانە بڕێك سووتەمەنی بۆ پاڵاوگەكان دابینبكرێن نرخی بەنزین بەم شێوەیە بەرزنابێتەوە.
