چەند ڕۆژێک پێش ئێستا گەنجێکی کورد بەناوی مێهرداد تاڵشی لە میترۆیەکی شاری تاراندا دەستگیرکراوە و گواستراوەتەوە بۆ زیندان، بەڵام لەوێ لەژێر ئەشکەنجەدا گیانی لە دەستداوە.
ئەو گەنجە کوردە خەڵکی شارۆچکەی دیواندەرە بووە و تەمەنی 21 ساڵە، چەند ڕۆژێک پێش ئێستا لەگەڵ کەسێکی دیکە دەستگیرکراون و گواستراونەتەوە بۆ بنکەی پۆلیسی 115 لە تاران.
ڕێکخراوەکانی مافی مرۆڤ لە ڕۆژهەڵاتی کوردستان ئاشکرایدەکەن، تەرمی گەنجە کوردەکە ئاسەواری لێدان و ئەشکەنجەی پێوە بووە.
سەرچاوەکە ئاماژەی بەوەکردووە، مێهرداد بە تۆمەتی هەڵگرتنی مادەی هۆشبەر دەستگیرکراوە و تا ئێستا هیچ زانیارییەک سەبارەت بە شوناس و چارەنووسی ئەو کەسەی دیکە لە بەر دەستدا نیە و تەنانەت لەو کەیسەدا ناوی کەسی دووەم سڕاوەتەوە.
دەستگیرکردنی مێهرداد بە تۆمەتی گۆمانلێکردن بە هەڵگرتنی مادەی هۆشبەر لە کاتێکدایە کە بە وتەی بنەماڵەکەی، ناوبراو هیچ جۆرە پێشینەی سزادان و تەنانەت بەکارهێنانی مادەی هۆشبەر نەبووە و وەرزشکار بووە.
باوکی مێهرداد قسەی بۆ ڕێکخراوەکان کردووە و دەڵێت، ئەوان پەیوەندیان کردووە بە نەخۆشخانە و پێیان ڕاگەیاندوون هیچ شتێک لەبارەی مەرگی گەنجەکەوە نازانن و تەنها بە تەرمی لەلایەن پۆلیسەوە ڕادەستیان کراوە.
