بەڕێوبەرایەتی پۆلیسی سلێمانی، ئەمڕۆ دووشەممە 8ی شوبات ڕایگەیاند، بەندکراوێک کە بەتۆمەتی هەوڵدان بۆ کوشتنی کەسێک دەستگیرکرابوو، ئەمڕۆ لە گەرماوی گرتن و گواستنەوەی سلێمانی بە خنکاوی دۆزرایەوە.
لە لێدوانێکدا بۆ تۆڕی میدیایی ئێستا سەرکەوت ئەحمەد، وتەبێژی بەڕێوبەرایەتیی پۆلیسی سلێمانی وتی، “ئەو بەندکراوە ناوی (یوسف گوڵ محەمەد)ە و لەدایکبووی 1953-ە”.
وتەبێژی پۆلیسی سلێمانی دەڵێت، “تۆمەتبارەکە لە دەربەندیخان بەتۆمەتی هەوڵدان بۆ کوشتنی کەسێک بەپێی مادەی 405 و 30 دەستگیرکرا و دواتر گوسترابووەوە بۆ گرتن و گواستنەوەی سلێمانی، ئەمڕۆ لەناو گەرماوی بەڕێوبەرایەتیی گرتن و گواستنەوەی سلێمانی بە خنکاوی دۆزرایەوە”.
بەپێی وتەی سەرکەوت ئەحمەد، “بەندکراوەکە بە پشتێنێک لە گەرماوەکەدا هەڵواسرا بوو گیانیلەدەستدابوو، تاوەکو ئێستاش نازانین ڕوداوەکە خۆکوژی بووە یاخود کەسێکی دیکە لە پشت ئەو ڕوداوەوەیە و لێکۆڵینەوەکان دەستیانپێکردووە”.
