توێژینەوەیەك: كۆچبەران ئابوری شارەكانی بەریتانیایان بوژاندووەتەوە

توێژینەوەیەكی نوێ ئاشكرایدەكات ئەو شارانەی بەریتانیا كە ژمارەیەكی زۆری كۆچبەریان تیایە و دانیشتووانەكەی فرەچەشنن، ئاستێكی ئابوریی زۆر باشتریان هەبووە لەو ناوچانەی كۆچبەریان كەمترە، بەپێی ڕۆژنامەی ئیندیپێندت كە توێژینەوەكەی بڵاوكردوەتەوە.

لە شیكردنەوەكانی دەسەڵاتدارێتی ناوخۆیی لە ئینگلتەرا و وێڵز “بوونی پەیوەندییەكی بەهێز لەنێوان جۆراوجۆری و گەشەكردن”دا بەدیكراوە، بەجۆرێك ئاستی ئابوری لە ناوچە فرەچەشنەكاندا باشتربووە لەوانی دیكە.

توێژینەوەكە لەلایەن كۆمەڵەی (Hope Not Hate)ی خێرخوازی دژ بە ڕەگەزپەستییەوە ئامادەكراوە و، مەبەست لێی ڕوبەڕوبوونەوەی تێڕوانینە نەرێنییەكانە بەرامبەر پرسی كۆچ، بەپێی پوختەكەشی “زیادبوونی فرەچەشنی بەشێكی گرنگە لە زیادبوونی گەشەكردن و، بەشدارە تیایدا”.

توێژینەوەكە ڕێنوێنی بۆ حكومەت و ئەنجومەنە ناوخۆییەكان تیایە دەربارەی چۆنیەتی بەڕێوبردنی گۆڕانكاری دیموگرافی هاوشانی گەشەی ئابوری.

بۆ ئامادەكردنی توێژینەوەكە، توێژەران زانیارییان لە 285 ناوچەی دەرەوەی شارە گەورەكان كۆكردووەتەوە، لەنێویشیاندا گەشەی ئابوری و نرخی خانوبەرە و ئاستی خستەسەركار و كرێ لەنێوان ساڵانی 2011 و 2019.

لەمیانەیدا بەراوردی ئاماژەكانی پێشوو بە پێوەری دیكە كراون وەك ڕێژەی دانیشتووانی لەدایكبووی دەرەوەی بەریتانیا و، ڕێژەی ئەوانەی باوانیان لە دەرەوەی شانشینی یەكگرتوو لەدایكبوون و، ژمارەی ئەو كەسانەی بە ڕەگەز بەریتانی نین.

توێژینەوەكە ڕێنوێنی دەكات بەوەی حكومەت ڕەچاوی پەیوەندی نێوان گەشە و فرەچەشنی بكات و، وەزارەتی ناوخۆ نوێگەری لە بنەماكانی تایبەت بە كۆچ بكات “بۆ ئەوەی ببێتە كۆمەڵگایەكی زیاتر جۆراوجۆر”، داواش لە سیاسییەكان دەكات دووبارە چاو بە دۆسیەی كۆچدا بخشێننەوە و سنوورێك بۆ سیاسەتی “دژایەتیكردن”ی كۆچبەران دابنێن.

ئیندپێندنت لەسەر زاری كریس كلارك، ئامادەكاری توێژینەوەكە وتی، “ئەم توێژینەوە ئاماژە بەوەدەكات كە كۆچ و فرەجۆری نەتەوەیی بەشێوەیەكی پتەو بەستراونەتەوە بە گەشەی ئابوری لە شار و ناوچەكانماندا”.

وتیشی، “كۆمەڵگا فرەچەشنەكان بەشێكی حەتمی و دانەبڕاوی بەرزبوونەوەی ئاستە، بۆ ئەوەی سیاسەتێكی سەركەوتوو هەبێت پێویستە تێگەیشتن هەبێت بەوەی كۆچ هۆكارێكی ئەرێنییە”.

بابەتی پێشتر

مێسی و بەرشلۆنە لە پاریس سانت جێرمان توڕەن

بابەتی دواتر

یورۆی 2021 ئەنجامدەدرێت؟ سەرۆکی فیدراسیۆنی ئەڵمانیا وەڵامدەداتەوە..

بابەتی پەیوەندیدار
Total
1
Share