جۆرجیا مێلۆنی، سەرۆکوەزیرانی ئیتاڵیا ڕایگەیاند، لە ماوەیەکی نزیکدا حکومەتەکەی ڕێکارێکی نوێ بۆ سنووردارکردنی ژمارەی خوێندکارانی بیانی لە ناوەندەکانی خوێندنی وڵاتەکەی ڕادەگەیەنێت، هەروەها پۆشینی نیقاب و ڕووبەند لە خوێندنگەکان قەدەغەدەکەن.
مێلۆنی لە وتارێکدا بۆ باڵی لاوانی سەر بە پارتە سیاسییەکەی خۆی، باسی لەوەکرد، خوێندنی زمانی ئیتاڵی بۆ خوێندکارە بیانییەکان دەکەن بە ناچاری و وتی، “ئەگەر دەتەوێت لە وڵاتەکەمان بمێنیتەوە و داهاتوویەک بونیادبنێیت،دەبێت فێری زمانەکەمان بیت و ڕێز لە یاسا و کەلتوورمان بگریت”.
مێلۆنی جەختیکردەوە، ڕێکارێکی نوێیان دژی ئەو کەسانە گرتووەتەبەر کە نیقاب و ڕووبەند دەپۆشن، بەتایبەتی ژنانی موسڵمان لە وڵاتەکەی و پاش ئەوەی لەلایەن حکومەت و پەرلەمانی ئیتاڵیاوە پەسەندکرا، یاساکە دەچێتە بواری جێبەجێکردنەوە و پۆشینی ئەو پۆشاکە ئیسلامییە لە ناوەندەکانی خوێندن لەو وڵاتە قەدەغەدەکرێت.
